Lalduhoma, Leader ZPM chuan Tuikum constituency huam chhunga Hmuntha leh Chhingchhip khua te tlawhin vantlang inkhawm leh ZPM hruaitute nen inkawm hona an nei thin a, nizan khan Chhingchhip Mualpui vengah Vantlang inkhawm buatsaih a ni a, khawtlang mipuiin an hlut hle a ni.
Lalduhoma chuan thusawiin, “Kan ram kan en hian kuthnathawktute kan thang lo a, loh theih loh avangin thingtlang lo kan la neih a ngai a, tuna kan ram inrelbawl dan leh hun kal tawha kan inkaihhruai dan kan en let chuan kuttuma eizawngtute hian sawrkar kan nei lo tluk a ni. Thingtlang lo neih bansan nan thlai chi hrang hrang min chintir tawh thin a, amaherawhchu, a market a mumal loh avangin rim takin thawk mah ila, a hlawhtlinna tak tak kan hmu ngai lo. A taima apiang beidawna ramah min siam ta a nih hi. Chutih laiin kan buh thar erawh chu Mizoram buh thar zatah an chhiar tel ziah a ni. Kan sual avanga thingtlang lo neih hi bansan duh lo kan ni lova, kan bansan thei rih lo a ni. Mipui tam zawk thingtlang kuthnathawk kan nih miau chuan ram hian hma rawn sawn ve mah se, kan chhawr ve tak tak lo a ni. Kawngpui awm lohnaah kawngpui a lo awm thawr pawhin, kan motor a tlan ve tak tak chuang lo. English medium awm lohnaah English medium a lo awm a, an fate luh phaktir tan chuan development tha tak a ni, a luhtir phak lo tan chuan an chhawr lo mai a ni lova, rualawh ti zualtu mai a ni. Chutiang chuan kan ramah hian development-in a thlawh khum hi kan tam ta em em a ni. Doctor thiam tak tak an lo chhuak a, damdawiin changkang leh tha tak tak a lo awm zel a, thingtlang kuthnathawktute min tibeidawngtu mai an ni zel a ni. Krismas leh Kum thar thawhlawm takngial pawh lungngai tak tak kan awm a ni. Heng kan unau, kuthnathawktute mangang au rawl hian min kai tho a, chhantu ngai a an au ri hian kan beng a thleng a, chhanntu hi an ngai em em a ni. Heng kan manganna denchhen hian kan ram politician thenkhat chuan politics an khel hreh miah lo a, sem policy hmangin kan rilru sukthlek tichhe vek khawpin min kaihruai a ni,” a ti bawk.
Lalduhoma chuan, “Thingtlang kuthnathawktute’n thingtlang lo neih kan bansan theih loh chhung hi chuan keini ZPM chuan thingtlang loneitute tan hian budget-ah pawisa engemaw zat dah a, a theihna kawng kawng a tanpui kan tum dawn a ni. Keini chuan kuthnathawktute chhanchuah theihna turin policy kan nei a, Bâna kaih (Hand Holding) Policy kan nei. Pakhatnaah chuan thlai thar kan lei dawn a. Puan lawk kan nei leh dawn a, kan mithiamte kutah kan dah a, an zirchiang mek a ni. Tuna kan sawi bak pawh hi Pathian zara sawrkarna kan lo chang a nih chuan sum awmdan a zirin a rate puan sa hi tih belh zel kan tum a ni,” a ti a, “Kan policy hmanga kan ram a dinchhuah theihna tura kan sawi thin thil pali te – thlai thar lei, vegetable supply chain, bultanna pek leh loan an lak theih nana guarantor-a din, chutiang sawrkar chu kan chhawp dawn a ni. Chutiang sawrkar Mizorama a din chuan mi dingchhuak duhte chu kan ding chhuak dawn khawp. Vawiinah chuan eng ang pawhin din chhuah tun mah ila, kan ding chhuak thei lo. Sawrkarin kan banah min kai lo a, puitu kan nei lo a ni. Din chhuah duhte, mi rual elte, mahni ke a din tum tak takte dinchhuah theihna sawrkar kan chhawp chhuak dawn a ni. Chutiang chhûngkua leh mimal chu kum 5 chhungin mahni kea ding thei tûrin kan siam vek dawn che u a ni,” a ti bawk.
