Joint Action Committee on Inner Line Reserved Forest Demand vawiin khan AIzawl Press Club-ah Press conference neiin, “Assam leh Mizoram-in ramri tihfel ngai kan neih avanga Dt. 17.11.2022-a State pahnihte aiawh inbiakna, Guwahati hmuna neihah Mizoram aiawhten Mizoram mipui, NGO’s leh political party zawng zawngte duhdan Bengal Eastern Frontier Regulation (BEFR) 1875-an dinpui hi lawmawm kan tiin, an thurelte pawhin beiseina sang tak min pe a, Mizoram sawrkar chungah Joint Action Committee on Inner Line Reserved Forest Demand chuan lawmthu a sawi a ni,” an ti
“Tun hma lama kan ram hauh chin te hun rei tak chhungin kil hrang hrangah Assam lam hian min luahsak ta nual mai a. Hengte hi a chhan ber chu khang hunlaia sawrkarna vuantu political party hrang hrangte leh sawrkar hnathawk ṭhenkhat inthlahdah vang a ni ber a. Tun hnaiah hmasawnna
ṭhenkhat hmuh tur a awm chho ta erawh a lawmawm hle a, Assam-in kan ram an luah mekte la let tur hian political party-te leh sawrkar lama mawhphurtute theihtawp chhuah zel turin kan in ngen thar leh a ni.
“Assam leh Mizoram sawrkar inbiakna kalpui anih mek lai leh Zoram mipuite Bengal Eastern Frontier Regulation (BEFR) 1875 ṭanchhan a kan din ngheh laia, thildang sawi a Article ziaka social media-a thusawi ṭhin tam tak kan awm ṭhin hi Joint Action Committee on Inner Line Reserved Forest Demand chuan pawi a tiin ṭhalo a ti hle a, mipui rilru tiphir a, tichiai zawnga thil ti tawh lo turin kan in ngen a. Tin, Pawl (NGO) leh Party anga advantage zawng lo turin Pawl (NGO) leh Party tinte kan in
ngen thar leh bawk a ni,” an ti bawk.
