Information and Public Relations Department leh Mizoram Art Development Society (MADS) tangkawp ten an buatsaih, ‘Mizoram Art Development Society Winter Workshop’ chu vawiin khan Aizawl Art Gallery, Khatla-ah PB Lianthangpuii, Joint Director, I&PR in a hawng.
PB Lianthangpuii chuan Art hmasawnna atana Mizoram district hrang hranga MADS member-te thawhhona chu fakin inlungrual lohna hi pawl hmelma leh hmasawnna daltu lian ber a ni zel thin a ti a. Hma sawn zel turin zir tawp a awm tur a ni lo tiin Lianthangpuii chuan, hnam a than ruala Art pawhin hma a sawn ve zel theih nan Art workshop chu Artist ten an thiamna intuai hriam thar zelna atan hmang tangkai a, tan la chhunzawm zel turin a fuih a. Art hlutna leh pawimawhna hrang hrang sawiin, Art hmangin artist ten ngaihtuahna khawvel hranah min hruai thei a, Art hi hnam nunphung leh ziarang vawn thatna pawimawh ber pakhat a niin Artist te chuan lemziak leh art hmangin sakhuana leh khawtlang nuna thil thalo siam that ngai te mipui hriatah pho langin ram mipui leh thuneitute rilru sukthlek pawh an sawi danglam thei a; Artist te chuan an kutah thiltihtheihna nasa tak an kawl a ni, a ti a. Khawvela thilsiam mawi tinreng te hi Siamtu kuthnu leh a signature lanna a ni tiin Lianthangpuii chuan Pathianin rawng chi hrang hrang hmanga khawvelah a kuthnu ropuizia a lantir angin artist te chuan an lemziakna hmanrua te hmangin signature ropui tak an hnutchhiah ve thei a ni, a ti.
Workshop hawnna inkhawm hi Laltanpuia President MADS in a kaihruai a, Vanlalhriata General Secretary MADS in report pe in workshop ah hian Mizoram district hrang hrang atangin MADS member 65 an tel a ni. Art workshop hawnna ah hian Information and Public Relations Department atangin officer te bakah MADS member thahnem tak an tel a. Winter Art Workshop hi Aizawl Art Gallery, Khatla, Aizawl-ah November 6-9 chhungin neih a ni dawn a ni.
