Mizo National Youth Front (MNYF) Hqrs. chuan vawiin khan tunlaia sawihlawh tak, cheng vaibelchhe 75 lai senna ni a sawi Zoram Mega Food Park, Khamrang, Kolosib District a mi chu MNYF Vice President Zodinpuia ho in an tlawh a. “He hmun hi Congress sorkar lai kum 2013-2018 chhunga buatsaihfel vek tawh anih avangin MNF sorkar-in inhnamhnawihna a neilo tih Zoram mipui hriatah kan puang duh a ni,” tiin thuchhuah an siam.
MNYF chuan “Zoram Mega Food Park, Khamrang hmun a mi hi Ministry of Food Processing Industry, Government of India scheme kaltlanga M/S Zoram Mega Food Park Pvt. Ltd-in a din leh enkawl a ni a. He hmun hi Congress sorkar lai a, Lal chhungkua leh an khawnbawl upa mi tlemte in Mizoram sorkar hnuaia Department thenkhat namnul taka an pal luih atanga rawn piangchhuak a ni.
“Sorkar kalphung mumal tak zawmlo a he hmun hi rawn piang anih avangin Zoram Mega Food Park chungchangah hian MNF sorkar chuan mawhphurhna a neih MNYF chuan a hrelo a. Central PMKSY scheme atanga funding hi M/S Zoram Mega Food Park Pvt. Ltd hnena pek an nih avang hian Mizoram sorkar-a nodal Department tura ngaihte pawhin vawiin thlengin engmah an hrelo a, an hnathawh endik leh a hmunhma sawngbawl chungchang ah te, a enkawltute dinhmun thlengin Mizoram sorkar chuan a hriatpuilo a ni.
“Pu Zoramthanga kaihhruai MNF sawrkar in Mizoram hmasawnna tur ngaihtuaha nasa taka hma alak lai leh, ram mipuite tan hmasawnna rotling tamtak a dinchhuahlai hian Congress party in ram tichhezawng hlir mai a hma an la thin hi MNYF chuan pawi a ti takzet a ni.
“A taka an hnathawh hmuhtur awmlo chhunga sum tamtak siamna Zo Carbon chungchang ah te, Sakawrhmuituai tlanga Skywalk siamna tur sum tamtak tihchingpenna ah te, Chaltlang-Durtlang inkara Ropeway siamna tur sum tamtak khawih chingpenna ah Congress hruaitute hming lamrik tur a awm reng mai te hi vanduaithlak kan ti takzet a ni.
“Mizoram chhunga opposition party thenkhaten ram leh mipui hmasawnna lam ngaihtuah lo a, dawt leh thudiklo hmanga MNF sawrkar beih a, mipui rilru hruaisual hi an tumber ni a alan avangin mipuite pawhin heng mite thu leh hla dawnsawn dan kan thiam hi angai hle ah kan ngai bawk ni,” an ti bawk.
