Vawiin December ni 9, 2022 Zirtawpni hian MNF party chuan Mizo Hnam Runah chhung inkhawm an nei a. He hunah hian K. Vanlalauva, MNF Treasurer chuan thu a sawi a.
K.Vanlalauva chuan, kumina Mizo Hnam Run chhung inkhawm hnuhnung ber tura thusawina hun a chang chu lawmawm a tih thu sawiin, karleh December ni 16, Zirtawpniah Exodus Day lawmna hun Vanapa Hall-ah hman a ni dawn a, party mite kal vek turin a sawm nghal a ni.
K. Vanlalauva chuan, tunhnaia Delhi a kal chungchang report pe in, MNF leh sorkar laipui inremna ziahfel hmaa tuna kan CM Pu Zoramthanga leh Dy CM Pu Tawna te an tanna leh an rawn tlanchhuahna Gulmohar Park tlawhin an kal tih a sawi a. MNF hotute leh India sorkar inbiak lai khan Pu Zoramthanga chu General Secretary niin, Pu Tawnluia hi Major a ni a. Inremna tura inbiakna neih laiin Delhi-ah India sorkarin a hreng thut a, an hrenna hmun Gulmohar Park atang hian an tlanchhuak a, India sorkarin MNF sorkar chhunga hem a zehna pholanga, hnam movement chhemalh lehtu an ni, a ti.
MNF in Hnam Thuthlung a kenna kawngah hian thuthang dik lo adarh ṭhin tih sawiin MNF Treasurer chuan, “Kan hma inthlan lo awm turah pawh hian tam tak a lo lang leh dâwn. Hemi kawngah hian fimkhur a ngaih thu sawiin, Ramhnuai a kan Hotuten harsatna hrang hrang an lo tawh atangin tun dinhmnunah pawh opposition ten kan CM chu namen lovin an sawi chhia a, tun aia nasa in an la sawi dawn chauha fimkhur tak leh nghet taka MNF te chu awm turin ka ngen che u a ni.
“Party dang zawng zawngin an do tur awmchhun kan nih vangin, lo inthlahdul lo ula. Lo in ring reng rawh u. Kan hnam Movement a min hruaitu hluite, hnam sipai ten min ṭin san a. An tlawm vang pawh a ni lo. An hmel hmuh pawh kan châk reng, kan hma December 16 a Exodus Day kan hman turah pawh lo tel vek turin kan sawm a ni” a ti.
MNF Treasurer chuan, MNF leader Pu Laldenga dam laia lehkha ziak ngam si lovin, a thih hnuah a nupui fanaute mittui titla turin Pu Laldenga beihna an ziak hlawm a. Pu Laldenga rintawk avanga hnam movement a zui chhuak kan ni. A dam laia lehkhabu ziak ngam si lo, a awm loh hnua ziak te hi mi dawihzep an ni, a ti.
Mizoramin Inremna kan mamawh lai tak, India sorkar leh MNF inbiak laia MP kan neih Pu Lalduhoma khan Parliament House-ah engmah a lo sawi ngai lo, a auchhuak lo reng reng tih tuna kan MP ten document an dil chhuah atangin a lang a. State dang MP te auchhuahna thu chhiar tur a awm laia khatih laia MP Pu Lalduhoma a ngawi reng kha mak tih loh rual a ni lo a ti. Party-ah chuan eng anga senior pawh ni ila kan rinawm loh va, tui anga nghet lo ka nih chuan Lalpan rintlakah ngaiin thuhretuah min ruat ngai lovang a ti bawk.
