Tarpho khuaa Food Civil Supplies & Consumer Affairs Deptt Godown & Related Infrastructures building chu vawiin khan bialtu MLA leh Minister ni bawk Dr. R.Lalthangliana’n hawngin building satu Babie Construction & Consultancy Services chuan sorkar kutah an hlan nghal a ni.
Minister Dr.R.Lalthangliana chuan a bial chhungah Godown thar hawn theih a ni chu FCS&CA Deptt chungah lawmthu a sawi a, sorkar in mipuite tana hmasawnna ruhrel a dinte hi a chhawr tangkaitu mipui ten neitu rilru puin uluk leh tha taka an enkawl a ngai a ni” tiin Covid in kum 2 leh a chanve dawn a tihbuai avanga sorkar sum harsat thu te, Vawkpul hri leh ramri buaina hmachhawn Myanmar buaina avanga raltlan te buaipui an ngaih thu leh tunah pawh Bangladesh atanga raltlante buaipui a tul thu sawiin duh leh beisei anga hmasawnna kalpui chak theih a nih lohna ah mipuite chu hrethiam turin a chah a, Pathian in hun tha a hawn sak leh ngei a rin thu a sawi bawk a ni.
Tarpho, Khawhri leh Aithur khuate tana Buhfai chhekkhawlna Godown hi NABARD Warehousing Scheme hnuaiah Rs. 1,70,68,972 sengin sak a ni a, Buhfai quintal 2000 lenna tur Godown, Storekeeper 2 chenna tur Building, toilet pahnih leh Godown kawtzawl PCC flooring te chu sak leh siam a ni
He hun hi Carolyn LB.Khiangte DCSO Lunglei kaihhruaiin Tarpho VCP Pu Lalchangliana chuan sorkar-in an khawtlang mamawh tak Godown a sak sak chu mipuite an lawmthu sawiin January 2023 atang chuan Godown thar atang ngeiin buhfai khulchhuah an beisei thu leh an ngen thu a sawi a, DCSO Lunglei chuan chak taka hmalak nghal a nih dawn thu leh an beisei anga tih hlawhtlin hman an tum thu a sawi a ni.
Godown thar inhlanna pawh neih nghal niin a satu Babie Construction & Consultancy Services aiawhin Er.Lalhumhima chuan hming a ziak a, Sorkar lam aiawhin DCSO Lunglei Carolyn LB Khiangte chuan a ziak bawk a ni
