LPG Home Delivery duhlo an awm

Chenna in ngeia eirawngbawlna Gas thlen tura hmalak mekah, distributor thenkhatin tute emaw hmanrua a hmangin sawrkar thupek suttir tumin hma an la niin Mizoram Consumers’ Union chuan an sawi a, Distributor ti tha duh lote hrem turin IOC leh Sawrkar an ngen.
MCU chuan thuchhuah siamin, he thu hi an tarlang a, Mizoram sawrkarin mipui hma khawngaia Aizawl AMC Area leh District khawpui zawng zawngah tun thla atanga LPG Home Delivery kalpui tura Distributor leh IOC te a hriattir tawh thu leh Division LPG Head, IOC Silchar pawhin Distributor zawng zawng te chu Home Delivery chu zaa za-a tihlawhtling turin November 18, 2022 khan a hriattir tawh tih an sawi a, hemi atan hian Gas bur khat zel ah cheng 68 vel chu IOC in Distributor hnenah a pe zel bawk tih an tarlang.
Hetih lai hian Distributor thenkhatin tute emaw hmanrua a hmangin sawrkar thupek sut tir turin hma an la nia an hriat thu an sawi a, Home delivery a gas lak chu a tirah chuan Mobile Register leh Gas book danah harsatna deuh awm mah se, awlsam te a chinfel theih a ni a, hetianga gas lak chu mipuite awlsamna zawk tur a ni an ti a, Distributor ti tha duh lo leh harsatna siam te chu IOC leh Sawrkarin hrem se an duh thu leh IOC Field Officer-te pawhin Distributor te chu enzui turin an ngen tih an sawi bawk a ni.