MPCC thuchhuah siamin, “December 9, 2022-a India ram rorelna in pakhat, Rajya Sabha a Uniform Civil Code pharh remtih a ni ta chu Congress party chuan pawi a ti tak zet a. BJP rorelna hnuaiah India rama hnam tenau zawkte, Mizo hnam leh kan Kristianna dinhmun thlengin a derthawng chho zel a ni,” an ti.
Thuchhuahah chuan, “India ramah hian hnam leh sakhaw hrang hrang tam tak kan awm a. Heng hnam leh sakhaw hrang hrangte hian kan hnamzia a zirin Hnam Dan (Customary Law) pawh kan nei hrang thliah a. Mizoramah pawh Hnam Dan tha tak, Mizo Customary Law kan nei a, chu dan hmang chuan inneih dan, nupa inthen dan leh rokhawm dan leh a dang tam tak kalpui a ni thin. Hetianga hnam leh sakhaw hrang hrangten kalphung fel tak kan neih thinte hi Uniform Civil Code (UCC) chuan nuaibo vek a, India ram pumah dan pakhat, inang tlang vek min hman tir a tum ta a ni. Hei hi BJP-in Hindu lal ram siam an tumna kal zel a ni tih mipuiten i hria ang u. UCC hi House a put luh tumin vawi engemawzat BJP hian an lo bei tawh thin a, Congress Party leh Opposition party dangten an dodal nasat em avangin an hlawhchham zel a, tunah hian Private member bill angin an pu lut lui ta a ni.
“He dan him lo leh tha lo tak chungchanga vote lak a nih lai hian Rajya Sabha MP, Pu K.Vanlalvena chu House-ah a awm lo a. The Mizoram Bulletin-in an kawmnaah, ‘Chhun dar 12:00 thleng ka awm…Member tam laiin an pu lut duh lo niin a lang. Vote thlak lai hian ka awm ve lo,’ a ti a. Amaherawhchu, December ni 9 chawhnu dar 2:30 leh dar 5:00 inkarah Private member bill ‘The Uniform Civil Code in India Bill, 2020’ hi sawiho hmasak ber tur a ni tih a hma ni hnih, December 6-a List of Business tih chhuahah chiang taka tarlan a nih tawh avangin MP Pu K. Vanlalvena hian a hre lawk vek a ni. Chuvangin, hre lawk vek chunga UCC dodal tura House-a a awm lo lui hi Mizoram Kristian-te tan pawm theih a ni lo a, Krstian sakhua leh Mizorama hnam hrang hrangte phatsanna dik tak a ni.
“Hetiang a nih avang hian Mizote hian kan hnam leh sakhaw kalphungte humhim turin UCC hi nasa taka kan dodal a ngai a. Dan puitlinga siam a nih hma ngeiin Kohhran leh NGO-te, Political Party zawng zawngte pawh kan hnam leh sakhaw himna tura theihtawpa UCC dodal a tangrual turin kan sawm a. MNF Party pawhin Central lama an thawhpui BJP-te rorel tum dan hi nasa taka dodal ngam turin kan phut a ni,” an ti bawk.
