Aizawl, 14th March, 2022 : Dr R. Lalthangliana, Minister, H&FW, Commerce & Industries leh Higher & Technical Education Department changtu chuan vawiin khan Delhi-ah sawrkar laipuia hotu pawimawhte dawrin Mizoram hmasawnna tura hma an lakna chi hrang hrang chungchang a sawipui.
Minister hian Niti Aayog Member pawimawh tak pakhat Pu Vinod Paul, chu bia in amah kaltlanga Civil Hospital, Aizawl-a Nephrology Department tihchangtlunna tur atan Corporate Social Responsibility (CSR) fund, Boeing Company a lo sawi chhuah sakna a zarah lawmthu a hrilh a, Boeing Company kaltlanga Civil Hospital, Aizawl-a dah tur MRI khawl tha chi chu a rang thei ang bera bun a nih theihnan hma lak sak turin a ngen bawk a, Pu Vinod Paul hian theih tawp a hhuah tur thu leh reiloteah a hlawhtlin ngei a beisei thu Minister hi a lo hrilh a ni.
Parliament Session lai a nih avangin Union Minister te hmuh a remchan loh avangin Dr R. Lalthangliana hian Health Secretary Dr. Rajesh Bhushan leh Ministry of Health & Family Welfare a official pawimawhte a kawm bawk a, Health Secretary a hmuhnaah hian Minister hian NHM-Mizoram hnuaia thawkte hlawh leh hmalakna tura ruahman programme leh project hrang hranga sum release ran loh chungchang a sawipui a, tuna PMES system hman mek khirhkhan lutuk chungchang a sawipui bawk.
Minister hian SRHF-ZMC-a Critical Care Block (CCB) khum 50 awmna tur siam belh chungchang pawh sawipuiin Union Health Secretary chuan rang taka State sawrkarin proposal an siam chuan hma lak nghal theih a nih tur thi a lo hrilh a ni. Kumin February thla a Union MoS Health Dr Bharati Pawar-in Aizawl a tlawh tuma inkawmna an neihnaah an lo thlen thil pawimawh tak tak panga – 1) District thar pathum, Hnahthial, Khawzawl leh Saitual district hospital khum 75 awmna tur sak dilna te; 2) Aizawl Civil Hospital main building upgrade na tur te, Blood bank, Laboratory block leh DNB Hostel building sak chungchang te; 3) Mizoram hmun hrang hranga Sub-Centre leh PHC building sak te;
4) District headquarters-tin a doctor leh staff quarters sak na tur te leh
5) Kan state tan a Mental Hospital din a nih theihnana hmalak pui tura ngenna te bawhzuina lehkha chu MoS Dr Bharati Pawar lo pe a hma lak pui turin a ngen a. Covid hrileng kara kan mamawh chi hrang hrang damdawi manto tak tak te thlenga thlawn a Mizoram an pek avangin lawmthu a sawi bawk.
Dr R. Lalthangliana hian ICMR hotute kawm bawkin anni hian RTPCR khawl 8 tun thla March, 2022 chhunga Mizorama thawn chhoh hman an beisei thu Minister hi an lo hrilh a ni.
Ministry of Education a an hotu pawimawh tak tak Addl. Secretary Pu Vineet Joshi leh Pi Kamila Chauhan, Jt.Secretary, RUSA te hmuin RUSA hnuaia zirtirtute hlawh rei tak central sorkain a hren avanga harsatna tawh chungchang a sawipui a, anni chuan Integrated Finance Division (IFD) in an la tihfel theihloh avanga delay a nih thu Minister hi an lo hrilh a. Minister hian rang taka release turin a thlen nawn leh a ni. RUSA-3 chu Central cabinet in an approve tawh thu leh hei hi kal chhunzawm pui turin a beiseiawm thu Minister hi an lo hrilh a, Dr Thangtea chuan Addl.Secretary hnenah hian Mizoram University Southern Campus kum 2020 January thla daih tawh a Central sorkarin din phalna a lo pek tawh, MZU hotuten an lo thlen tawh chungchangah chak deuh a hma la turin a thlen nawn leh a. Hemi chungchangah hian MZU Vice Chancellor leh hotute rang taka lo sawipui a, thil tihfel ngai la tihfel loh a awm a nih pawha tifel thuai thei turin hma lak an tum thu a lo hrilh a ni.
Minister hian MSME Secretary Pu BB Swain pawh hmu in Commerce & Industries a Mizoram in project a siam sawrkar laipuia tangkhang leh thil pawimawh hrang hrang an lo thehluh tawh te a sawipui a. MSME hnuaiah hian reiloteah scheme tha deuh mai an tihchhuah tur thu Secretary hian Dr. Thangtea chu lo hrilhin Scheme thar a nih avangin uluk lehzuala hemi chungchanga meeting neih a sawiho chu Minister hian tha a ti a, tun thla March ni 31, 2022 hian Mizorama Commerce & Industries Department officialte telin Delhi a meeting nei turin ruahmanna an siam dun nghal a ni.
