Deputy Chief Minister Tawnluia’n vawiin khan Mizoram Secretariat Service Association (MSSA) General Conference vawi 17-na Aijal Club-ah a hmanpui a, sorkar hnathawkte chu thingtlang lam mite tha taka lo dawngsawng thin turin a fuih.
Deputy Chief Minister Tawnluia chuan Mizoram Secretariat Service hnathawkte chu sawrkar inrelbawlna hrang hrang – Secretariat-ah te, Department-ah te leh District-ah te an awm avangin sawrkar in nghaktu an ni a ti a. Sawrkar neitu an nih angin thahnem ngai taka hna thawk zel turin leh ramin hma a sawn zel nana ngaihtuahna seng zual zel turin a fuih a. Sawrkar neitu an nihna angin harsatna leh thildang a lo awm pawha tuar hram hram a, thinglung pau kauh tak neia awm turin a fuih bawk a ni. MSSA member-te chu sawrkar finchhuahah te, hotute thurawn pekah te sawrkar tawiawmtu an ni tih hre renga thapui thawh a hnaa inpe belhchhah zel turin a duh thu a sawi.
Khuallian chuan sawrkar hna chu hlawh lakna atan chauha ngai lova mahni invawn kawngah te, hun dik vawn kawngah te, mahni inthunun kawngah te hna in a phut anga awm turin a chah a. Mipui tana rawngbawl an nih chu hre reng tura chahin Deputy Chief Minister Pu Tawnluia chuan mipui, abik takin thingtlang lam atanga anmahni dawr tura lokal te dimdawi a, tha taka lo dawngsawng a, Mizoram mipuite rawngbawl sak zel turin a duh thu a sawi a ni.
Conference chawhma session hi MSSA Senior Vice President, Zahmingthanga chuan kaihruaiin, MSSA President Betsy Zothanpari chuan MSSA in tunhnaia an pawl hmalakna thenkhat te tarlangin hun a hmang a. Member Pu B.Lalthantluanga Sailo sunna hun hman a nih bakah member thar lawmluhna leh kaisang te lawmpuina neih a ni bawk a. Chawhma hun hi MSSA Vice President TC Lalkhuma chuan lawmthu sawiin a khar a ni.
