Vawiin hian Art & Culture Auditorium, Beraw Tlangah Aizawl East I South Block MNF Conference leh mithar lawmluhna hun hman a ni a. He hun hi bialtu MLA, Chief Minister Zoramthanga’n a hmanpui a. Block chhung veng hrang hrang aṭangin voter 644 MNF Party-ah lawmluh an ni.
Zoramthanga MNF President chuan thusawiin, MNF-te hi kan vanduai nge kan vannei, term hmasaah Mau tam vangin Zoram harsatna thlen hunah min sorkar tir a. Tunah lah nise khawvel ram zawng zawng buaina Covid-19, hun khirh leh harsa tawp khawk Pathianin min hruai chhuak lehin Zoram enkawl turin min han thlang leh a. MNF Party hi Pathian hian Zofate tan an hmaa ding tur atan min duh zia alang chiang hle a ni, a ti.
Zoramthanga chuan, “Central-in budget-ah lo telh thlap rawh u a tih zing atangin cheng vaibelchhe 3000 chuang kan han hmu lo a ni a. Vaibelchhe 3000 chuang hi kei ni state-te tan chuan harsat em em phahna tur khawp a tam a ni. Pathian hian hun harsaah erawh min dah reng dawn lova, Israel fate angin hun harsa min paltlang tir hmasak phawt hnuah ram tiam lamah min hruai thleng leh ṭhin,” a ti a. “Pu Zoramthanga chu sum leh paiah a thiam loh vanga lawm sum lamah kan harsat tiin min bei a, min beitute hian an han dap chawp khawp a. Sairanga vai pakhat nen smuggling an ti tlang tiin a mik amak pawh hre ve lo kan fanute thleng thlengin dawt ngial ngan lutuk hmanga min han bei mai hi chu an dap chawp mah mah ta a ni,” a ti.
MNF President chuan, “Kan Zoram Party din hmun thlir ila, Congress hi chu beih hran an ngai tawh lova, MLA pahnih an neih chuan an vannei hle ang. ZPM lah hi eng emaw hleka kalphung thar nei reng mai, kum 30 dawn min han chhin teh u ti reng mai, election a pianga mipuiin an chhin duh si loh, election awm leh tur atan a hming thar phuah leh zel mai an ni a. Election-a an chak loh apianga Party thar din reng mai, mahni Party din pawh ning leh thin, midang Party-a an va awm lahin an hruaitute luahlan tum nghal ngawt zel an nih avangin, hetiang hruaitu hi mipui hian an ring thei thlawt lo a ni tih a chiang hle,” a ti bawk.
He hun hi Zosangliana Khiangte, Aizawl East I South Block President-in a kaihruai a ni.
