Golden Jubilee pualin thisen pek a ni

Mizoram Journalists’ Association in kum 50 a tlinna, Golden Jubilee lawmna chi khat atan vawiin, 15th March 2022 khan Civil Hospital Aizawl Blood Bank tan a thlawnin thisen unit 16 an pe a, thisen petu hi mipa 15 leh hmeichhia pakhat an ni.
Golden Jubilee puala thisen pekah hian MJA Gen. Hqrs. hnuaia member-te leh anmahni phungbawmtuten thisen hi an pe a. Blood Bank hnathawktute leh hotuten an lo buaipui a ni.
MJA hian kumin, 2022 January 7 khan Jubilee mei detin Golden Jubilee lawmna a hmang tan a. MJA Gen. Hqrs. bakah District MJA hrang hrangten Jubilee pual hian hun an buatsaih tawh a ni. General Headquarters chuan workshop chi hnih – ‘Workshop on Stress and Stress Management’ a nei tawh a, vaihlo chungchangah workshop cum consultative meeting nei leh turin an inruahman mek bawk.