Cabinet Minister Lalruatkima, Information & Public Relations Department changtu chuan vawiin khan I &PR Office Treasury Square ep chiaha I&PR Department in building thar, Lianchhiari Run, NEC tanpuinaa cheng nuai 1000 senga an sak mek a tlawh a. Building sak mek a fan kual hnua, building thara, a chhung lam cheina tur furnishings leh tul dangte chungchanga sum mamawh dil mek chu Secrtary, I & PR, Pi H.M. Hualsangi; Planning & Programme Implementation, Principal Adviser-cum-Addl. Secretary Dr. Lalrinchanna leh SRO Pi Jessie leh I & PR Director Pu C. Lalnunkima leh a thawhpuite a sawipui a ni.
Pu Lalruatkima chuan I & PR building sak mek chu office building a ni mai piah bakah mipui mamawh – mini theatre te, conference hall leh conference room te, exhibition space leh lirthei hunna parking space te a awm tel avangte, hmun laili taka awm avangtein hmun pawimawh tak mipuiin an chawr tangkai theih tur a ni dawn a, chuvangin a sak zawh hun hi a ngahhleh awm hle tih a sawi a. Parking fee leh hall hmanna atangin he building hi amah a inenkawl zo tura ruahman a nih angin sawrkar tan pawh a enkawl zuina tur hi ngaihtuah a ngai dawn em em lova, sum thawhchhuah revenue pawh sawrkar tan a thawkchhuah thei dawn niin a lang a, mahse a chhung cheina tura bungrua leh mamawh dangte chu NEC estimate ah a tel loh avangin hei hi Planning Department lamah dil mek a nih thu a sawi a. A satu contractor te chu tun Sawrkar kum kallai mek ral hma ngeiin sa zo hman turin a ngen bawk a ni.
Tun dinhmunah hian he building sak zawh hna hi za zelah 95 vel zawh tawh a ni a. Chawng 7 a sak niin lirthei ke phahih nei 70 bawr leh ke pali 40 vel dah thei tura ruahman a ni a. Mini Theatre, Conference Hall, Conference Room leh Roof Top Exhibition Space te a awm dawn bawk a. He project a sum za zelah 90 hi NEC tum niin a bak za zelah 10 chu State Sawrkar thawh a thung.
