Tukin zing khan H.Lalengmawia, IAS, Commissioner, Home chuan District hrang hranga DC leh SP leh Excise leh Narcotics Officer te kan hma lawka hunpui krismas 2022 leh kum thar 2023 lo awm tur atana mipuite himna tur leh hlim leh lawm taka hunpui an hman theihna tur leh thil dang kaihhnawih hrang hrang te a hma an lak dan te sawihona leh 19/10/2022-a Home Minister hova meeting neih zawh tak an bawhzuina te thlirhona hun Video Conference hmanga neih chu Chief Secretary Video conference room atangin a kaihruai.
He Video Conference-ah hian Home Commissioner chuan thu sawiin DC leh SP te chu dan anga an hnathawhnaah hawihhawmna thlahthlam lo turin a hrilh a. Kohhran leh khawtlang hruaitute leh tlawmngaipawl te nena an thawhhona te chu a lawmawm takzet a ni, a ti a, nasa zawka thawkho chhunzawm turin a fuih a ni.Refugee chungchanga an harsatna sawi te chu a pawimawh thu sawiin, ruahmanna tha zawk nei thei tura ngaihtuahna sen a pawimawh a ni, a ti.
District hrang hranga DC leh SP te pawhin report pein krismas leh kumthar vuakveta an inpuahchahna te an sawiho a. District tinah halpuah leh halmawi hal khapna chhuah deuh vek tawh niin, zu leh ruihtheihthil dangte khuahkhirhnaah ngawrh takin hma an la a, Krismas dawn hnaihah mobile patrolling neih an tum hlawm bawk. Raltlan chungchang a an dinhmun leh harsatna te sawiin kawng tamtak ah kohhran leh tlawmngaipawlte nena an thawhho thu an sawi bawk a ni.
Meeting hi Chief Secretary pawhin telpuiin Covid chungchanga Central sawrkar ngaih pawimawhte sawina hun tawi a hmang a. District tina thuneitute chu en thlithlai leh a tam thei ang bera test kalpui turin a fuih a. Tunah chuan inkhuahkhirhna hranpa awm rih lo mahse, kan hmanraw neihte dinhmun hriat a, lo inrinlawksa a pawimawh a ni, a ti.
