Khawlian khua in kum za a tlinna ‘Khawlian Meimit lo Centenary’ lawmna chu January ni 5 leh ni 6 hian hman a ni a. Vawiin khan Chief Minister Zoramthanga chu khuallian niin a hmanpui a. Speaker Lalrinliana Sailo chu khualzahawm a ni.
Chief Minister chuan Khawlian meimit lo a awm Centenary programme a hmanpui thei chu lawmawm tiin, he a lawmna programme buatsaiha remruatna siamtute chu fakawm a ti a. Khawlian khaw din a nih a, pi leh pute hun atanga a lo kal chhoh dan leh khawtlang mi pawimawhte an chawimawi dan chu entawntlak a tih thu a sawi bawk. Chief Minister chuan helai tlangdung hmasawnna chu sawrkarin a ngaih pawimawh thu a sawi a. Daido leh Vawmkawt inkar kawng siamna tur pawh hmasawnna hna thawh tur ruahman zinga ngaih pawimawhah telhin, sawrkar laipuia umzui a nih hnuin cheng vaibelchhe 31 dah a nih tak thu a sawi a. Heng bakah hian kalkawng siam leh hmasawnna ruhrel hmachhawp engemawzat hmar tlang dung tan hian a awm thu a sawi a. Vawiina khawtlang hruaitute’n khawtlang mamawh an thlente pawh a hriatpui thu leh, a remchan anga a lo bawhzuipui zel thu a sawi a ni.
Chief Minister hian “Khawlian Person of the Century” dawngtu Pu Raltawnkima (L) fapa hnenah chawimawina a hlan bawk a ni.
Khualzahawm Lalrinliana Sailo chuan Khawlian Centenary lawmna ropui tak hman a ni thei chu lawmawm a ti a. Khawlian khua chuan history ngaihnawm tak a neih thu te sawi telin, helai tlangdung hmasawnna atana sawrkar pawhin theihtawp a chhuah thu a sawi a. Khua hmasawnna atan khaw hmun nghaktu leh hmun hrang hranga awmte’n mawhphurhna an nei vek a ni. Pu Lalrinliana Sailo chuan khawvel hmasawnna in a ken tel zingah social media tangkaina leh, kawng lehlamah hman sualna kawng hrang hranga khawtlang nuna harsatna a thlen thu sawiin, fimkhur pawimawh a tul thu a sawi tel.
Centenary lawmna inkhawm hi H. Lianzela, Khawlian Centenary Celebration Organising Committee (KCCOC) chuan a kaihruai a. Chief Minister hian Khawlian khawchhunga Centenary Tower sak chu a hawng bawk a. Lawmna inkhawmah hian Centenary Dar Vuak, Centenary Flag Pawhpharh, Balloon 100 chhuahna te neiin, zai leh lam entirin hun hman a ni.
