Vawiin ni January ni 10, 2023 Thawhlehni hian Mizo Hnam Runah chhung inkhawm neih a ni a, hun hnihnaah MNF Vice President Vanlalzawma leh Adviser Lalruatkima ten thu an sawi.
Vanlalzawma chuan, “Nimin January ni 9 a Party hrang hrangin CYMA hmalakna thlawpa mahni party Pisa hawn tur pawh khar hiala hma kan la thei kha Mizote kan lungrual zia lanna a ni. Kan unaute tan tha thlah lovin kan pen zel dawn a ni,” a ti. Pu Zawma chuan, kan Hnam martar te kha an huaisen vang leh an chák vang a ni lova, he ram an hmangaih vanga nun hlan an ni, a ti.
Vanlalzawma chuan, Hqrs. ang pawhin hma kan la zel ang a, campaign pawh uar zawk leh ngawrh zawk a neih tum a ni a, kan vai hian kan sawrkar leh sawrkar lohah mawh kan phur a, kan ti thei vek a ni. Kum 2008-ah MLA 3 chiah kan nei a, kum 2013-ah MLA 5, kan han tang vak a kum 2018-ah chuan Pathian zarah sawrkarna kan chang ta a, lungrual tak leh pheikhai rual takin i kal zel ang u, a ti.
MNF Adviser leh minister ni bawk Lalruatkima pawhin thusawiin, tunlaia hmun hrang hrang Zofate harsatna tawh dan leh Mizoram sawrkar hmalakna te a tarlang. Minister chuan Bangladesh atanga rawn raltlan (refugee) te buaipui chu thil buaithlak tak, Politics khelhna atana hman chi pawh a nih chiah loh thu a sawi. A chhan chu United Nation High Commissioner for Refugees Convention 1951 leh hemi behchhana Protocol 1967 a siamah India hi a signatory ram zingah a tel ve loh avangin hmalak a har zual a ni a ti. Zohnahthlak mangang taka lo tlan khawm te hi an khawngaihthlak hle a. Kan Mizopuite tawrhna leh manganna hi sawrkar ang pawhin kan hriatpui, hrehawm pawh kan ti. Mizoram Sawrkar chuan theih tawp kan chhuah a, kan chhuah zel dawn bawk a ni a ti. Duh ang leh ruahman ang diak diak a thil a kal chak thei rih lo chu pawi a tih thu a sawi.
Lalruatkima chuan, “Kan chipuite mangang a awm hi kan phal lo, a tul a nih chuan Central sawrkar pawh kan nawr zel dawn a ni,” a ti. “Buaina tawkte hi kan Hnam pui an nih miau vangin, Mizo tlawmngaihna leh thian chhhan thih ngam rilru kha kan Sawrkar Pu Zoramthanga kaihhruai hi chuan a kalpui zel dawn a ni. A tul a, a rem a nih chuan Bangladesh sawrkar te pawh kan la dawr ang,” a ti.
MNF Adviser chua, “Mizo kan nihna angin, kan chipuite natnaah chuan kan na a, kan rum a, thihna ten an chungah thla a zar a ni tih kan hriat phei chuan kan rum a ni. He thil hian Mizo inunauna, tan ho duhna leh sawrkar hmalakna thlawp duhna rilru hi tuh thar se tih hi ka sawi duh a, vwiin hian Mizo mipuite ka ngen nghal a ni. Heng kan unaute a ṭul anga buaipui leh tanpui hna thawktu zawng zawng te chungah lawmthu ka sawi mawlh mawlh bawk a ni.
Tun dinhmunah raltlante hi Parva-III ah mi 212 awmin, In 34 sak sak an ni a. Vathuampuiah mi 34 awmin, Primary School leh mimal inah te dah an ni a. Mautlangah mi 46 dah niin, Primary school leh Middle school-ah dah an ni. Chamdur P’ ah mi 44 awm tawhin, camp pahnih pindan 14 awm siamsak an ni. Tin, Hmawngbu-ah mi 52 lut tawhin, Community Hall-ah awmkhawm lailawktir an ni a. An chenna tur sak tan mek a ni.
