Financial Literacy Week hman tur chungchangah Larsap hmu

P.Shimrah, Officer-in-Charge, Reserve Bank of India (RBI) Office, Aizawl, V.Jayachandra, Chairman, Mizoram Rural Bank, leh RBI officer dang ten vawiin khan Larsap Hari Babu Kambhampati chu Raj Bhavan an hmu a. He hunah hian Bank Official te chuan February thla chawhmaah Financial Literacy Week (FLW) hman an tum dan te hrilh in Larsap chu FLW hawng tur leh a hawnna inkhawmah khuallian atan an sawm nghal a ni.
RBI hotute nena an inkawmnaah hian Larsap chuan Mizoramah Bank hmalakna tur a la tam thu a sawi a. Mipui nawlpuiin welfare scheme, social security scheme, loan puk theih chungchang leh an bank account kaihhnawih banking services an dawn theih tur chungchang te chiang zawk a hriat an la mamawh a. Bank hnathawk ten tan an lak chhunzawm a la ngai hle a ni a ti. Tunhnaiah SLBC report a lo thlir thu sawiin hemi report ah hian social security scheme leh welfare scheme thenkhata inziak lut an pung tih a hmuh thu a sawi a. Larsap chuan he hmasawnna hi bank hnathawk te tanlakna rah a ni a. Bank hnathawk ten tan an lak chhunzawm chuan hei aia hmasawnna lian zawk hi a beiseiawm a ti.
FLW Chhunga mipuiten Bank chungchanga hre tur a duh deuh te Banker te hi a hrilh a. Loan te nau mamawhtu Aizawl khawpuiah ringawt pawh hian tam tak an awm mek a. Heng sumdawng tenau – Hawker, chawhmeh zuar leh a dang te zingah hian Rs 50,000 a tang a Rs 10,00,000/- thleng lak theih na Mudra Loan te hi an hriatchian chuan puk mamawh leh duh tam tak an awm ngei a rin thu a sawi a ni. Larsap chuan thalai vengva tur deuh chin – college zirlai te hnenah te stock market leh a kaihhnawih thil te FLW chhung hian zirtir ve ni se tha a tih thu a sawi bawk.
Bank Official te report pek dan chuan FLW hi February 13 atanga 17 thleng neih a ni leh dawn a. He hunah hian Bank kaihnawih thil leh sum enkawlna chungchangah zirtirna ngawrh taka inpek tum a ni a. kumina FLW neih turaha hian Zirlaite, loneitute, Self Help Groups leh sumdawng te nau te zirtirna uluk zawka pek tum a ni. Financial inclusiveness leh Education tih thupui hnuaiah kawng hrang hrangah sum vawm dan, bank services chungchang leh a dang te zirtirna pek tum a ni a. FLW chhung hian Bank Official te chuan sum peipun dan leh sum khawl dan awmze nei zawk customer te hriattir an tum dawn a. Sum leh Bank account kaihhnawih a bumna chi hrang hrang lak a customer leh mipui nawlpui an lo him zawk dan tur chungchang pawh a zau thei ang bera inzirtir tum a ni.