Larsap Hari Babu Kambhampati chuan Bharti Airtel Ltd a Zonal Officer leh Engineer te Raj Bhavan-ah a kawm a. He hunah hian Airtel in Mizoram hmalakna liantham a neih mek te, an harsatna leh hmachhawp pawimawh an neih te sawiho a ni.
Larsap chuan Mizoramah Airtel hmalakna a tha thawkhat nia a hriat thu a sawi a. 5G Network pawh hlawhtling taka kalpui turin duhsakna hlanin he internet network chak zawk hian Education, Health leh Banking-ah hmasawnna a rawn thlen ngei dawn a. Heng bakah hian 5G Network tangkaina tur pawh thil dang tam takah a awm tih a sawi. Governor chuan Aizawl leh Lunglei khawpui te bakah District Capital leh thingtlang khawlian deuhah te pawh 5G network leh Fiber Network te siam belh zel turin Airtel hotute chu a chah a. Thingtlangah leh hmun kilkhawrah te network connectivity a chhiat avangin Bank service a tha thei lo a, customer ten harsatna an tawk mek a. Hei hi telecom service provider te chuan an ngaihven thuai a tul a ni a ti.
Airtel hotute hian PowerPoint Presentation hmangin Mizorama Airtel hmalakna pawimawh zual, an inzar pharh dan, tower bun zat leh an hmachhawp te an sawi fiah a. Tunhnaia an hmalakna lianber chu India Hmarchhak biala a palina ni turin Internet pekchhuahna network chak ber chi, 5G Network February 2023 a hman theih turin nasa takin an inpuahchah mek tih an sawi. 5G Network hi Aizawl khawpuiah leh Lungleiah hman tan a ni dawn a.
Aizawl hmunlun lai, pawimawh lai leh sumdawnna hmunah Tower 53 leh hetiang bawkin Lungleiah Tower 10 te bun hmasak a ni dawn a. April 2023 thla chhungin District headquarter zawng zawngah 5G service pek hman an inbeisei tih an sawi. Airtel hotute chuan thingtlang lamah pawh internet chak zawka pe chhuak turin Fibre an thlun belh chhunzawm dawn tih an sawi bawk a. An harsatna tawh thin, tower bunna chungchangah mipui inzirtir kan la ngai a, veng thenkhatah chuan tower bun lo hlauh leh duh loh avangin network a awm lo tan tawh tih an sawi a. Thingtlang lamah erawh chuan Village Council te thlawpna tha tak an dawn thin avanga lawmawm an tih thu an sawi bawk.
