Vawiin Dt 3. February 2023 hian Aizawl West Joint YMA Multipurpose Hall-ah MNF National Executive Meeting neih a ni a. He hunah hian MNF President Zoramthanga chuan thusawiin, “Kum tawp lama inthlanpui kan hmachhawn turah Pathian leh mipui zarah kan sorkar leh ngei kan beisei,” a ti.
MNF President chuan, “Pathian leh mipui zarah kan sorkar leh ngei kan beisei a. Pathianin MLA ṭha tak tak 27 min pe mek a, an ni hian an bial ṭheuhah theih tawpin ṭan an la a. Hmasawnna ropui tak an kalpui mek hlawm a ni,” a ti a. “He kan ministry hi Corruption leh thil dangah mualphona lian tham kan nei lo a. Covid hripui a leng chungin hmasawnna hna nasa takin kan thawk a, chu chu mipui hian an hria a ni,” a ti.
Zoramthanga chuan, “He sorkar an beihna ber financial management thiam lo, tih a ni a. Kan sawi tawh angin Covid hripui avangin kan sum hmuh tur cheng vaibelchhe 3000 chuang kan hmu lo. Hei hian harsatna nasa tak min siam a ni,” a ti.
MNF President chuan, “Kan khingpuite en hian kan sorkar leh ngei a rinawm zual a. Congress hi Central-ah an tla chhe vek tawh a, Mizoramah pawh an tlachhe tawh a. An arte lukawn thei hialin ka hria. Tling an awm pawhin an tam lovang,” a ti a. “ZPM lah nise an din tirha an sawi zawng zawng an sawi ngam tawh lo a. ‘Movement kan ni, party kan ni lo’ an ti ṭhin a, party an ni chiang ta em em a. ‘Kohhran kan unit’ an tih ṭhinte pawh an sawi ngam tawh lo. A tira an sawi uar em em tuna sawi ngam tawh loh an ngah hle a ni,” a ti bawk.
National Executive Meeting hi Zoramthanga President-in a kaihruai a. MNF Headquarters term tawp tawh chu inthan kum a nih avangin pawisei tih tluk a ni.
