Vawiin February ni 3, 2023 hian ZPM Thalai Hqrs. President, Dr. C. Lalrammawia leh ZPM Ṭhalai G.S- te chuan Mizoram State Cancer Institute (MSCI) chu a hmunah kalin a dinhmun an enfiah a, Dr. C. Lalrammawia chuan, “Mizoram hi cancer vei tamna State kan nih avangin cancer veite enkawlna tha kan neih a tul hle a, khawl leh mi thiam kan neih tawk loh avanga sum tam tak senga harsa taka phaia inenkawl tura kan kaltir thinnate hi kan tihtlem theihna tur sorkar-in nasa zawkin hma la se,” a ti.
Mizoram State Cancer Institute-in khawl tha tak tak leh thawktu inpe tak tak a lo nei chu ZPM Thalai chuan lawmawm a ti a. Chutihrual chuan heng khawlte hian enkawltu technician sawm tal an mamawh laiin mi paruk chauh an awm a, hetia thawktu indaihlohna nasa tak avang hian heng khawlte an theihna (capacity) anga hman theih an la ni lo chu ZPM Ṭhalai chuan pawi kan ti hle a, kan Sorkar hian cancer veite hmakhua ngaia Technician dah belh thuai turin an ngen a ni.
ZPM Ṭhalai-te’n MSCI building an tlawhna ah hian Block-II building, lânga damlote chemotherapy an tihna hmunah wheelchair-a innawr theihna kawng (ramp) a awm loh avangin dam chau tak takte step-ah puak an ngai thin a ni tih hmuh chhuah a ni a, chuvang chuan he building-a lift an siam hi hman thuai a nih theih nan chak taka hma la turin thuneitute an ngen a ni.
