Vawiin khan Mizo Language Development Board (MLDB) Office luah leh hlanna hun an Office atana buatsaih AIS Transit Building-2, MINECO, Aizawl-ah neih a ni.
MLDB Office hawn leh hlanna hun hi Revd. Chuauțhuama’n a hmang a, thu a sawiah Synod inkhawmpuiin Mizo țawng tihhmasawn leh hman chungchang a lo rel tawh dan leh hmalakna te, Mizo Language Development Board chu kohhranin din țul a lo tih tawh dan te a sawi a, MLDB lo ding ta chu lawmawm a tih thu te, țawng tihhmasawnna kawngah thawh tur tam tak a awm nia a hriat thu te, MLDB chu țawng lama țhahnemngaite nghahhlelh a nih thu a sawi a ni.
MLDB Chairman leh School Education Department Secretary Dr. Lalzirmawia Chhangte chuan he hunah hian thusawiin Mizoram sorkarin MLDB dina a țha thei ang bera hmalak chu a tum thu a sawi a. Mizo țawng humhalh, tihhausak leh tihhmasawn hna te chu MLDB-in a thawk dawn a ni a ti. MLDB chu țhiah leh mai tur ni lovin Board nghet turin sorkarin a din a ni a ti. Chairman leh Secretary nghet te chu appointment rules, terms & condition te peih fel a nih hnuah dah an ni dawn a, Chairman, Secretary leh thawktu dangte post pawh sanction fel tawh a nih thu te a sawi bawk.
MLDB office luah leh hlannaah hian Mizo Academy of Letters President Prof. R.L.Thanmawia, Pu R. Lallianzuala, President Mizo Writter Association leh Pu R. Lallawmzuala President Mizo Grammar Society ten thu an sawi bawk.
MLD Board chu School Education Department hnuaia awm turin GAD-in allocation of Business Rules 2019 ah a dah a. Ni 7.2.2022 khan Cabinet meeting-in a pawm fel a, Board hna thawh dan tur ruangam pawh Cabinet meeting-in a pawm tawh a, Acts Notified tawh a ni a, Service Rules leh Delegation of Financial power pawh tih chhuah țep a ni. Ni 10.3.2022 khan Mizoram Legislative Assembly Budget Session-ah MLD Board bill pass a ni a, Mizoram sorkarin regular hairman awm hmaa chairman turin Dr. Lalzirmawia Chhangte IAS, Secretary, School Education ni mek leh Member Secretary, HRD Board chu a ruat a ni.
MLDB office hawn leh hlanna hi Dr H. Lalthlangliana, Director, School Education-in a kaihruai a, School Education Department Secretariat leh Directorate officer te, SCERT leh Samagra Shiksha officer te an tel a. Mizo Academy of Letters, Mizo Writters’ Association leh Mizo Grammar Society hruaitute an tel bawk a ni.
