ZPM Thalai chuan February ni 4, 2023 khan ZPM Thalai President, Dr. C. Lalrammawia hovin Lengpui Airport an tlawh leh a, ZPM Thalai chuan, “Lengpui Airport-a thlawhnaa zinte harsatna, trolley indaihloh leh thil dang chungchang kan lo auchhuahpui tawhin ngaihsak a hlawh tawk lo chu pawi kan ti a, mipui ngaihpawimawhlohna lian takah kan ngai a; tuna Lengpui Airport kan tlawh tumah pawh GAD atangin Airport Terminal chhungah thlalak an phal lo hi mak kan ti a, MNF sorkar-in Lengpui Airport an sak dan hi an zahpui ta em ni? kan ti a ni.
“ZPM Thalai chuan luggage trolley 22 chiah hman tur a awm te, insak bungrua thiarnaa hman a nih avanga trolley tam tak chhia a awmte hi pawi kan ti a,chu bakah sum tam tak senralna Airport sak hna muang lutuk leh a hna chhe lutuk chu pawi kan ti a ni. G-20 summit March ni 2-a kan thlen turah hian MNF sorkar hian Mizoram mipuite Lengpui Airport hnathawh muang leh chhia avang hian min mualpho mai ang tih kan hlau hle a ni.
“Lengpui Airport hi duhsak zawngte sum insiamna atan hmang lovin ram rohlu siamna atan hmang turin MNF sawrkâr kan ngen a ni,” an ti bawk.
