Vawiin khan ZPM General Headquarters Campaign Committee buatsaihin Vaivakawn Cultural Centre-ah ‘Training on Capacity Building & Resource Mobilization’ neih a ni a. He hun hi K Sapdanga, Working President & Campaign Committee Chairman-in a kaihruai a ni.
Lalliansawta, ZPM President chuan, ” Vawiinah hetiang programme hlu tak buatsaih a ni hi lawmawm ka ti hle. He programme hlawhtlinna tura nasa taka inbuatsaih kan resource person tha tak tak kan party-in kan nei te hi a lawmawm takzet a ni. Khawvel hian enkawltu a mamawh a, mihring te leh thilsiam te kan cheng ho a, chung zawng zawng siamtu chu Pathian a ni. Mihring te hi mawhphurhna hrang hrang neia siam kan ni a, chung kan mawhphurhna hrang hrang tha taka hlen tura buatsaih kan ni. Pathianin min siam ang chhan taka kan nun theihna turin politics tha kan mamawh a, politics tha siam tur leh Pathian duh ang taka he leilung hi enkawl leh sawngbawl a nih theihna turin thinlung thianghlim leh rilru tha kan put a ngai a ni. Lalna leh thuneihna atchilhna hi Pathian duh loh zawng tak a ni a, roreltu tam tak a duh loh zawnga khawsa thin pawh an lalthutthleng atangin a hnuk thla thin a ni. ZPM-in kan aupui ber kalphung thar hi sawrkar hun chauha hman tur ni lovin, vawiin atang hian kan hmang tur a ni. Sum leh pai hmachhuana campaign-te hi Pathian lawmzawng a nih loh avangin, kan rinchhan Pathian duh zawngin campaign kan bei ang a, kan hmahruaitu Pathian a nih phawt chuan hnehna kan chang ngei ang tih hi i ring tlat ang u. Rorelna chu Lalpa ta a ni a, Chungnungbera hian a duh chu a chawikang a, a duh chu a phet hniam thin. Kan innghahna ber chu Pathian lo ni mawlh rawh se,” a ti.
