Dated Aizawl, the 9th February, 2023 : Congress Thalai (MPYCC) chuan thuchhuah siamin, “National Health Mission (NHM) hnuaia thawk ten nikum December 2022 leh kumin January 2023 hlawh vawiin thlenga an la la lo hi Mizoram Pradesh Youth Congress Committee (MPYCC) chuan pawi kan ti hle a, a rang thei ang bera an hlawhte pe chhuak nghal turin Mizoram sawrkar kan phut a ni,” an ti.
Thuchhuahah chuan, “National Health Mission (NHM) Mizoram hnuaiah hian 4th Grade atanga Doctor Specialist thlengin mi 2200 chuang an thawk mek a, hah pawh sawi thei lovin mipuite hrisel nan indaihlo tak chungin an duty a. Hetih mek laia an thlabi hlawh Sawrkarin a batsak reng thin hi MPYCC chuan vanduaithlak kan ti hle a. December 2022 & January 2023 thlabi hlawh atana Central Sawrkarin a tum ve tur (90:10) chu December 24, 2022 daih tawh khan Mizoram Sawrkar ah an rawn release tawh tih MPYCC in kan hriat phei chuan engti kawng maha chhuanlam siam lo tur leh tikhawtlai lova NHM thawktute hlawh hi pe chhuak nghal turin Mizoram Sawrkar hi tih tak zetin kan phut a. A tulna apiangah NHM thawktute thlavang hi MPYCC chuan kan hauh tlat zel dawn a ni,” an ti bawk.