NHM Employees Union Mizoram memberte chuan tun hnai a
Federation of Mizoram Government Employees & Workers (FMGE&W) in a
hun taka hlawh an lak theih loh avanga sawrkar laka an lungawi loh thu
chhuah an siam chu awm an tih puiin an hriatthiam pui takzet tih an sawi a,
“Hnathawktute; thawk nghet emaw, nghet lo emaw, CSS hnuaia mi pawh ni
se, a hun taka an thawh hlawh pe thei tura inbuatsaih tur leh ruahmanna siam
turin sawrkar thuneitute kan ngen thar leh a. Tun hnaia FMGE&W in hma an
lak chhohna tur pawh hi kan thlawp in ngun takin an hmalakna kan lo en ve
reng ang a, a hun taka hlawh kan hmuh tlan theihna turin a tul angin kan lo
thlithlai zel dawn a ni,” an ti.
Vawiina thuchhuah an siamah chuan, “16th August 2021-ah CSS hnuaia thawktute hamthatna tur zirchiang tura sawrkarin a din Study Team in an zir chianna leh rawtna; sawrkar huntiam a ral fe hnu ah leh NEUM hruaituten Chief Minister meuh an hmuh tawh hnu ah pawh tun thlenga Cabinet meeting ah ngaihtuah tura chhawpchhuah pawh a la ni lo chu hriatthiam a har kan ti a, a tul dan angin sawrkar hmalakna kan thli thlai zui reng dawn a, memberte pawh a tul dan anga lo in ruahman turin kan in hriattir a ni e.
“Mipui hriselna kawnga thawktute kan nih avangin kan ngaih pawimawh ber chu mipui hriselna a ni reng fo ang. Amaherawhchu, kan harsatna kan thlen thinte, kan hamthatna tura hma min laksakna kawnga sawrkar hmalakna te chik zawkin kan umzui in kan thlithlai chho reng dawn a ni,” an ti bawk.
