Vawiin February 10, 2023 hian Congress Party buatsaihin Lengpui Airport Chhanchhuah Hnatlang, Lengpui Airport-ah neih a ni a. Aizawl khawpui chhung leh a chhehvel atangin Congress Party mipuite Lengpuiah kan fuankhawm a ni.
He huna thu sawitu H. Zairemthanga, MPCC Action Committee Chairman chuan, “Lengpui Airport hi cheng vaibelchhe 97.92 senga siam a ni a, December 1995 a sak tan a ni a, hetih lai hi Congress sorkar lai niin, Pu Lal Thanhawla Chief Minister nih lai a ni. Kum hnih leh thla hnih chhung lek a sak zawh niin, Congress sorkar lai vek kum 1998 February thla kan sak zawh a ni. Enchhin ngai neuh neuh a tam avangin Congress sorkar laia hawn hman a ni ta lo a. MNF sorkar thar a lo pian hnu lawk, December 2, 1998-ah hawn a ni ta a ni. Chuvangin, Lengpui airport neitu nihna hi kan thinlungah a awm tlat a, tih hmel hema a awm hi kan duh lo a, kan rilru a na a ni. Lengpui Airport chhung leh a pawn lam cheithat hna hi M/s Zoramchhana (CM Pu Zoramthanga tupa) leh M/s KR Construction (Kamrula Chhangte) te hnenah dan lo a restricted tender hmanga a pek an ni a. A vaiin cheng vaibelchhe 116 man a ni nghe nghe. Work order pek an nih hma daihin hna an thawk tawh a ni. An hna thawh a tha lovin, Tui pawh pek pek mumal a ni lo a, nakinah chhiatna rapthlak zawk a thleng ang tih hlauhawm tak a ni. Lengpui Airport hian duat taka enkawltu sorkar a mamawh. MNF sorkarna hnuaiah hian neitu rilru pu lo a, sumtuakna atana an hmang mai mai hi kan rilru a na a ni,” a ti.
Lalrobiaka, Ex MLA, ADCC President pawhin thu sawiin, Lengpui Airport-ah dan leh thupek lal rawh se a ti a, “Vawiin a duty Police-te pawh hi sorkar tha hnuaiah chuan India ram police tha ber in ni leh dawn a ni tih ka puang duh a ni. Mizoram mipuite tan kum 2023 kum tawpah hian Zalenna dar kan vaw dawn a ni,” a ti bawk.
Lalawmpuii Chawngthu, ex Minister, Mahila Hqrs President chuan, “He airport hi Congress party sorkar laia siam a ni, a chhiat kan phal lo. Buaina siam tura helai hmuna pungkhawm kan ni lo, Airport siamthat hna thawktuten zin veivakte hman tur awm lo khawpa Airport trolley an tichhiate hi kan duh lo. Contractor-te hian a tharin thlak leh vek rawh se. Pathian leh kan ram tan ti tu, Hnam Party intiten Mizorama Airport kan neih chhun Lengpui Airport a hnamdang contractor Kamrula a hmangte hi kan duh lo. Tuirial Hydel Project leh Falkawn Referral Hospital-te anga MNF-ten Lengpui Airport an sawpchhiat leh mai mai hi kan hlau a ni, kan phal lo,” a ti.
Dr. Lalmalsawma Nghaka, MPYCC President pawhin thu sawiin, “Mizoram sorkar a GAD Aviation-ah hian sum chingpen tam tak a awm tih kan hria a. Lokayukta-ah FIR kan thehlut a, Lokayukta chuan CBI chhui tir nise a ti a, order a chhuah atangin kum 2 a liam tawh, MNF sorkarin engmah a la ti lo. Helai Lengpui Airport chim chungchangah pawh MPYCC-in FIR kan thehlut a, mahse, MNF sorkarin engmah a ti chuang lo. Airport siamthat hna thawktuten bungraw thiar nana trolley an hmang leh an tichhe vek hi a tha lo kan ti. Trolley hman tur awm loh vanga NE newspaper hrang hranga Mizoram kan mualphote hi a na kan ti,” a ti.
Lengpui Airport a contractor ten trolley an tihchhiat chungchang hi National Students’ Union of India (NSUI) chuan zirchiangin, Congress sorkar laia Trolley 300-400 awm thin kha 25 chauh hmantlak a awm tawh a ni tih an hmuchhuak a. January 23, 2023 khan thuchhuah an siam a, Contractor ten Trolley an tihchhiatte chu ni 15 chhung ngei a a thara thlak vek turin an phut a ni. Amaherawhchu, an hun tiam, February 7, 2023-a a ral thleng pawhin thlak a ni lo a, thlak tumna a awm hek lo. Tin, MNF sorkar atangin Contractor lakah action lak a ni miah lo bawk.
Lengpui Airport Chhanchhuah Hnatlangah hian resolution engemawzat siam a ni bawk.
