Chief minister Zoramthanga, Finance changtu nibawk chuan vawiin Assembly Budget Session ah kum 2023-24 atana Mizoram budget ruahman Rs. Vbc 14,209.95 a pharh. Budget thar hi 2022-23 budget Rs. Vbc. 14,008.15 aiin Rs. Vbc. 201.80 in a tam zawk a. State sawrkar flagship programme SEDP (Family Oriented) ah Rs. Vbc. 300 dah a ni.
Chief minister hian budget a pharh rual hian kum 2021-22 chhunga sum indaih lohna phuhrukna tur Supplementary Demand For Grants Rs. vbc. 3,141.36 a pharh nghal bawk.
Chief minister chuan budget hi 8th Mizoram Legislative Assembly atana budget hnuhnung ber tur a ni tih sawiin, “Kum hnih zet covid hripuiin min nuai lai khan kan Mizo tlawmngaihna leh inlungrualna chu kan chakna thahrui a ni a. Mahse kan hma lam hun han thlir hian fimkhur taka ke pen a la ngai dawn a, hemi avang hian hmasawnna kawngah mipuite pawhin rilru zau tak kan put tlan theih a ngai dawn a ni,” a ti.
Mi tam zawk tan hmasawnna ngelnghet a awm theih nan kum 2022-23 ah Rs. vbc. 350 chu Family Oriented SEDP atan bik liau liau dah hran a ni tih tarlang bawkin, hemi hnuaiah hian trade hrang hrang kaltlangin chhungkaw 60,000 hnenah Rs. 50,000 pek tura tih a nih thu te, tun kum lo awm turah hian Family Oriented SEDP atan hian Rs. vbc. 300 dah leh a ni tih a tarlang.
Finance minister tarlan danin. kum lo kal tura sawrkar leiba zawng zawng tling khawm chu Rs. vbc. 13,584.80 ni tura chhut a ni a, heta tanga Debt/GSDP ratio chu 37.84% a ni ang. Tun hnai kum 5 chhung emaw -a kan debt-sustainability chu kum 2018-19 (Actuals)-ah 32.89%; 2019-20 (Actuals)-ah 32.72%; 2020 -21 (Actuals)-ah 33.98%; 2021 -22 (Actuals)-ah 40.98% a ni a, kumin 2022 – 23 (RE)-ah 41.29% te an ni.
Revenue section leh Capital section atanga sum hmuh tura beisei zawng zawng chu Rs. vbc. 14,209.95 a ni tih finance minister chuan tarlang bawkin, “Nikuma budget estimate pharh chu Rs. vbc. 14,008.15 a ni a. Nikuma project lian tham PM-DevINE atanga Rs. vbc. 600.00 zat kan neih ang kha kuminah kan nei tawh lo na chungin, nikum budget aia Rs. vbc. 201.80 zeta tam kan han pharh thei hi a lawmawm hle a ni,” a ti bawk.
Finance minister budget pharh taka langsar zualte :
1. SEDP ah Rs. vbc. 595 dah niin –
a) Rs. vbc. 220 chu Scheme hrang hrang, CSS, EAP, NCDC etc, counterpart funding atan dah a ni a, hei hi kum kal meka hemi atana dah aiin Cheng Vbch 20.00 -in a tam zawk a ni.
b) Family Oriented Scheme atan Cheng Vbch 300.00 dah a ni.
c) Cheng Vbch 50.00 chu Health Care Scheme atan ruahman a ni.
d) Cheng Vbch 25.00 chu untied SEDP atan dah a ni.
2. Health Care Scheme atan Rs. vbc. 60 dah a ni.
3. Kumin 2023 chhunga Mizoram State General Assembly election November, 2023-a lo awm tur atan Rs. vbc. 200 ruahman a ni a, a tul dan anga pek chhuah tur a ni.
4. Kum hmasa lam angin, Rs. vbc. 5 chu MNF Returnees- te intundin lehna atan dah a ni.
5. MLA Local Area Development Fund – Rs. vbc. 60
6. Thangtharte zinga lehkha thiam beiseiawm rualte All India Service leh Central Service dangahte an luh theih nana ruahmanna kal mek tihhlawhtlin nan Rs. Nuai 50 dah leh a ni.
7. Higher & Technical Department hnuaia College zirlaite’n fee an pek hisapin Rs. Nuai 120 chu College hrang hrang inenkawlna atan dah a ni
8. Mizorama NGO hrang hrangte’n khawtlang rawngbawlna an thawh tanpuina atan Rs. Nuai 50 chu Art & Culture Department hnuaiah dah a ni.
9. Mipuite’n hniang hnar taka power supply kan dawn theihna tur leh sumdawnna hrang hranga tangkaia hman turin Power purchase atan Rs. vbc. 400 ruahman a ni a. Hei bakah hian transmission charge atan Rs. vbc. 40 dah hran a ni.
10. PHE Department hnuaia Tui pump hna thawh nan Rs. vbc. 35.50 ruahman a ni a. Hei hi kum kal meka hemi puala aiin vbc. 10 -in a tam zawk.
11. District thar Rural Development Office hawn thar enkawlna atan Rs. vbc. 5.76 dah a ni a. BDO Office hawn thar pahnih tan Rs. Nuai 20 dah a ni bawk.
