Vairengte Police OC Pu H. Lalchawimawia, Vairengte atanga sawn chhuah anih dan chungchangah Vairengte a Thalai pawl, Social Reconstruction & Enlightement (SORE) Vairengte chuan a lungawithlak lo hle nia an hriat thusawiin, “Sorkar hnathawkte hi khawi hmunah pawh sawn kual theih anni in tuna an sawn tur pawh hi kan ui viau rualin kan pawmpui a. Hetihrual hian an hotute hnena a dil anga an tun thla chhunga a fapa School kal lak lawh exam chhungte pawh nghak thei lova, DGP in vawiin Dt.14.2.2023 (Thawhlehni)a OC charge inhlan thuai tura a tih hi kan hrethiam thei lova. Vairengte khaw tan te, ramri chungchangah te leh hnamdang nen a buaina a chhuah chang te a thei tawp a ram leh a Mizo puite tana hna alo thawh ve tawhna te pawh zah zo lova, hnamdang pakhat, Police hotu (DGP) in ama duh dan te a chhuak rum rum tura a ti lui tlat hi kan pawm ve thei lo a ni,” an ti.
SORE chuan, “Hetianga midang pawh sawn tello leh kumin inthlanpui neih dawn a sorkar hnathawkte sawn kual huna sawn mai thei reng anih laia, amah mimal taka sawn chhuah rum rum duhtu, Mizoram Police DGP thil tih dan hi kan dem tak zet a. An hotute hnena a dilna anga naupang exam chhung te tal chu a post ah hian awm tir rih turin Sorkar a thuneitu sangte kan ngen nghal a ni. Tin,Vairengte Police OC, Pu H.Lalchawimawia hian amimal taka Police ti hmingchhe zawng emaw ram tana thil thalo a tih emaw kan hre lova, Aizawl khawpuiah pawh Police Officer tha ber nihna lo dawng tawhtu hetiang taka sawn chhuah anih ngei ngei theih nan DGP hmalak dan hi kan dem tak zet a ni,” an ti bawk.
