Dated Aizawl, the 15th February, 2023: MPYCC chuan thuchhuah siamin, “Chief Minister Pu Zoramthanga’n tunhnaia Press Conference a neihnaah, Sawrkar hnathawkte hlawh pek hun chungchang tehkhin thu-a a sawi chuan Sawrkar hnathawkte a tibeidawng hle mai a. Sawrkar hnathawk tam berte hian an thlabi hlawh hi thla thar tirah lak an duh vek a, thla kipa man chawi ngai hrang hrang leh Loan late tan tlai taka hlawh lak a nih hian kawng hrang hrangin harsatna an tawk thin a. A hun taka hlawh lak an duh ngawih ngawih tawh laia Finance Minister berin Ni 1-a lak leh ni 15-a lak a la tehkhin chuan Sawrkar hnathawkte te a ti lungngai em em a. Sum enkawl thiam lo Finance Minister Mizoram-in kan nei hi MPYCC chuan pawi kan ti hle a. Sawrkar hnathawk pension te pawhin an pension chhuahpui sum an khawl vaibelchhe tel an la thei lova, Congress Sawrkar laia GP Fund an mamawh ang zela withdraw thin angte kha tun MNF Sawrkar-ah chuan vana rah ang a lo ni ta te hi Sawrkar hnathawkte ngaih pawimawh lohna lian tak niin MPYCC chuan kan ngai a ni.
“Chuvangin, Finance enkawl thiam leh tawnhriat ngah Pu Lalsawta chu tun dinhmuna Mizoram sum leh pai tlachhe mek siamtha tura kan mamawh lian ber a ni tih MPYCC chuan mipuite hnenah kan puang thar leh a, a laka rinna nghat tur leh lo thlawp tlat turin Zoram mipuite kan sawm che u a. Pu Lalsawta kaihhruaina hnuaiah chuan Sawrkar hnathawk ten an dikna leh chanvo a hun takah an chang zel dawn a ni,” tiin an tarlang.
