Vawiin February 15, 2023 ( Nilaini) chhun dar 12:00 (Noon)-a PC Party hruaitite’n a Mizoram Budget chungchâng thlirhona nei-ah President Vanlalruata chuan Mizoram Sum dinhmun a chhiat chak thu a sawi.
Mizoram state budget thar 2023 -2024 chungchang thu sawiin, Vanlalruata chuan, ”Kan budget thar hi cheng vbc 640.01 a indaihlo sa a bul ṭan tur anni nghal ngawt a; Cheng vbc 272.33 puk belh chung pawh a kum tawp a cheng vbc 628.51 a indaihlohna nei tura chhut a ni a. Kan ram sum dinhmun hi a chhe chak hle a ni,” a ti.
Vanlalruata chuan, “Nikum (2021-22) khan indaihlohna hi cheng vbc 123.34 kan nei sa a; Khami kum khan cheng vbc 4,595.03 lawih pukbelh chungin kum tawp a indaihlohna kan neih chu cheng vbc 507.48 lawih a ni a; Kum kallai (2022-23) hian kum tirah indaihlohna cheng vbc 133.09 nei tura chhut niin cheng vbc 2,582.54 pûk belh a, kum tawpah pawisa hman ban cheng vbc 23.41 nei tura duan a ni a, Pûk tura ruahman aia tam – cheng vbc 3,197.23 pûk chungin kum tawpa indaihlohna nia chhût chu cheng vbc 640.01 a ni thung a ni. Kum kal tawh dinhmun thlirin a takah chuan hei ai hian a tam ang” tih sawiin, PC President chuan, “Heng aṭanga en hian kumin kum tawpa indaihlohna tura chhut cheng vbc 628.51 hi cheng vbc 1,000 a kai theih hial a rinawm ka ti” a ti a.Hetiang taka Mizoram sum dinhmun a chhiat chak viau lai hian Mizoram hian Finance Minister tha nei angah kan la in ngai thei em?,” a ti bawk.
