Vawiin February 16, 2023 hian Action Committee, MPCC buatsaihin Mizoram hmun hrang hrangah MNF sorkar duh lohna leh Zoram Chhanchhuahna Poster tar hnatlang a ruala neih a ni a. Aizawl bakah District hrang hrang leh Constituency hrang hrangah a ruala poster tar a ni a, poster tarpui turin Aizawl atangin Congress Party hruaitu thahnem tak an zinchhuak a ni.
Aizawlah chuan chawhnu dar 1:00 khan Transport Office kawt, Zodin Square-ah Poster tar hnatlang pualin vantlang inkhawm buatsaih a ni a. Lal Thanzara, Ex Minister, Vice President, MPCC leh hruaitu engemawzatin thu an sawi. Lal Thanzara chuan, “MNF sorkarin SEDP nuai 3 semin chak takin sorkar an kalpui kan lo beisei a. Mahse, kum 4 kan thlir hnuah thil awmdan hi a beidawn thlak takzet a ni tih Mizoram mipuiin kan lo hre ta. Chuvangin, Mizoram pumah poster tar hnatlang kan nei ta hial a ni. MNF sorkar thar a pian veleh khan Lengpui airport-ah sum tam tak a awm tih an hriat avangin an duh ang tawka an suasam theih nan Aviation-a officer fel tak chu an petchhuak a, CM-in duh duh a sum a zen pui theih tur Principal Consultant an indah a. Airport enkawltu hnathawktu turte pawh a nghet lo hlira dah an ni. CM-in Lengpui Airport cheithat hna a tlawh tlut tlut a, chuta hna thawk tura a thlan chu hnamdang contractor Kamrula Chhangte leh CM tupa an ni. Airport suasamin an duh tawkin hma an la a, an hmanraw hmante a tha lo hle a, bungrua an tichhe nasa hle bawk. Airport an suasam dan khu Airport enkawltu Officer-te leh hnathawktu tam takte pawhin an lainat a, an rilru a na em em a ni,” a ti.
“Healthcare-ah mi harsate inenkawlna turin cheng nuai 2 thlengin SEDP atangin dah a ni tih CM-in a puang a. Mahse, Assembly House a an tarlan danin healthcare leiba, bill pek theih loh vaibelchhe 65.9 a awm a ni tih kan hre leh si. Dam lo chhungkua apiangte hman atana SEDP Healthcare cheng nuai 2 an dah chu khawiah nge tih hi ka zawt a ni,” a ti bawk.
Sum leh pai enkawlna kawnga MNF sorkar hlawhchham zia sawiin, “Mizoram sorkarin leiba a ngah em em a, puk tur an zawng reng a. Sorkar hnathawkten a hunah hlawh an la thei lo a, pensioner-ten pawisa an la thei lo a, damloten healthcare pawisa an dawng thei hek lo. Chutiang dinhmuna kan din tak avang chuan MPCC chuan Zoram chhanchhuahna poster tar hnatlang a nei ta a, hun lo kal leh zel turah pawh Zoram chhanchhuah hna hi kan la thawk dawn chauh a ni,” a ti bawk.
Lal Thanzara chuan ZPM chu enchhin vek tawh an ni tih sawiin, “Tuna min enchhin rawh u ti tute hi Party tinin kan lo enchhin tawhte, party hrang hranga lo awm tawh kalkhawm, vote hmu sang ngai miah lote an ni. Enchhin kan duh hrim hrim a nih chuan ‘kan ti ang’ tih chu ti mai thin Congress Party kan awm e. NLUP Rs. 30,000 ka sem ang kan ti a, kan sem mai. Rangva inchung tur kan sem ang kan ti leh a, an awih lo a, mahse kan sem mai. Remna leh muanna a thlen theih nan lalthutthleng pawh kan kian ang tiin kan inzuar a, kan kian leh mai bawk. NLUP nuai 1 kan sem ang kan ti a, an awih lo a, mahse, Mizoram a chhungkaw sing tam tak hnenah NLUP tanpuina nuai 1 leh a aia tam kan pe thei a ni. Congress party hi a thutiamah a ding thin a ni mai lo a, sorkar hmasa thil tihchhiat tawh Tuirial Hydel Project te, Referral Hospital te, Medical College te hial kan din thei. Vawiin a power a harsatna kan neih tawh mang lohna chhan chu Congress sorkarin MNF sawpchhiat hnu Tuirial Hydel Project leh project dang tam tak a tih hlawhtlin vang a ni. Chuvangin, Mizoram mipuite min enchhin leh turin ka sawm che u a ni,” a ti.
“Mizoram mipuite, mi tha tak tak te, NGO hruaitute, sorkar hnathawkte, professor te, damdawi lam thiamte sorkar tha siampui turin kan sawm che u a ni. Kum 10 kan sorkar chhung khan mipui tih lungawilohna tam tak kan nei tih kan hria. Mahse, kan danglam tawh dawn. Lalsawta hovin Sorkar Tha siam hi kan tum tak tak a ni,” a ti.
He hunah hian Lalrobiaka, Ex MLA, President, ADCC, Vanlalawmpuii Chawngthu, President, Mahila leh Dr. Lalmalsawma Nghaka, President, MPYCC-ten thu an sawi bawk.
Poster hi Aizawl khawpui chhung bakah khaw hrang hrang 150 chuangah a ruala tar a ni a, poster 15,000 vel tar a ni.
