Aizawl, the 17th March 2022: Vawiin khan Governor Hari Babu Kambhampati chuan Padma Shri Award 2022 dawngtu Pu VL Nghaka, Ramhlun South venga cheng chu Raj Bhavan-ah lengah sawmin a hlawhtlinna a lawmpui a. Pu VL Nghaka hi Mizorama Hindi tawng zirna leh tihhmasawnna lama a thawh that avanga Literature and Education huang bika Padma Shri Award 2022 dawng turin thlan a ni a; March 28 hian Rashtrapati Bhavan-ah President of India hnen atangin a dawng dawn a ni.
Governor Hari Babu Kambhampati chuan Pu VL Nghaka chu Mizoram mipuiin kan lawmpui a, kan chhuang a ni a ti a. Tawng pawimawhna sawiin tawng thiam tam a tul a, midang te nena kan inlaichinna leh inpawh zawk nan pawh tawng hi thil pawimawh tak a ni a ti. Governor chuan Hindi te, English te, kan chhevela cheng te tawng leh mahni tawng thiam kan tum a ngai a tih a sawi a. Kum 1954 daih atang tawha India ram tawng pawimawh ber Hindi zirtirnaah Mizoramah bul a lo tan tawh tih a hriatin Governor chuan Pu VL Nghaka chu a ngaihsan thu a sawi a ni. Hindi zirtirna leh tawng tih hmasawnna kawnga a thawh that bakah Rambuai lain hna tangkai tak a lo thawk thin thu te leh tum engemaw zah, a tlawmngaih leh huaisen avanga midangte nunna a lo chhanhim tawh chungchang te pawh a lo hriat thu sawiin Pu VL Nghaka nunah entawn tur tam tak a awm a ni a ti.
Pu VL Nghaka H/o Lalbiakveli (L) hi kum 1930 khan a piang a. Kum 1954-ah Hindi Visharad zoin Mizo zingah a hmasaber nihna a hauh a; kum 1976-ah M.A leh kum 1980-ah M.Ed. a zo leh bawk a ni. School Education Department-ah hun rei tak mawhphurhna pawimawh tak tak a chelh hnuah DIET, Aizawl principal hna thawk a. Kum 1991 khan sorkar hna atangjn a chåwl a ni.
Kum 1954 khan Kawnpuiah Assam Hindi Prachar Samiti a hoin din a ni a. Hei hi lo changtlung chho zelin a hnuah Mizoram Hindi Prachar Sabha a lo ni ta a ni. Mizoram Hindi Prachar Sabha in hma alo sawn zel na kawngah leh Mizorama Hindi zir pawimawh chungchangin ngaihven a hlawh chhoh zelna kawngah hmahruaitu leh theihtawp chhuah thin a ni a. Tunah hian Mizoram Hindi Prachar Sabha hnuaiah hian BA Hindi zirna school 18 a awm tawh a, Prachar Centre 35 leh Vidhyalayas 64 a awm a; Bed zirna Hindi Training College pawh a awm tawh a. Heng zirna in atangin Hindi twang Degree nei tam tak an zir chhuak tawh bawk a. Hindi zirna kawngah lehkhabu tangkai tak tak a ziak nual tawh a; heng lehkhabu zingah hian Hindi Grammar, Hindi- Mizo Dictionary leh Hindi Pariksha Sahayika te phei chuan ngaihhlut a hlawh hle a ni.
