MPCC chuan thuchhuah siamin, “Vawiin 17.2.2023 chhun dar 12:00 hian J. Thankima College-in NAAC atanga Accreditation A+ an hmuh lawmna Vanapa Hall-a an neih turah khuallian niin Chief Minister Pu Zoramthanga’n a hmanpui dawn tih J. Thankima College thuneitute hian MPCC President Pu Lalsawta chu ni 16.2.2023 zan khan an hrilh a, an programme neih tura ruahman lawkna an neihte tibuai lo turin an ngen nghal bawk,” an ti.
Thuchhuahah chuan, “MPCC President Pu Lalsawta hian J. Thankima College ngenna hi a zahawm em avangin, vawiina MPCC Action Committee-in Programme siam tura ruahmanna an neihah J. Thankima College Programme tibuai thei turin Chief Minister Pu Zoramthanga chu an dang dawn lo tih a lo hrilh a. MPCC President sawi angin vawiinah kar tina MPCC Friday Political Session Congress Bhavan-a neih thin bak programme dang siam a ni lo. Vawiinah Congress Party hian khawi hmunah mah mipui che vel tibuai turin programme a siam lo a ni.
“Hetih lai hian Sorkar lam chuan mipui tiralkhel takin Police thahnem tawk tak chu Aizawl Press Club bul leh Mizofed Petrol Pump bul Treasury Square, Aizawl-ah a duty tir a. Chief Minister Pu Zoramthanga ngei pawh hian Assembly House-a Session neihna hi chawhma lam khan a chhuahsan nghe nghe.
“J. Thankima College-in Grade sang zawk an nei hi kan lawmpui em em a, a lawmna programme pawh tluang taka an neih theih nan duhsakna sang ber kan hlan e. Hetih laia Chief Minister berin dawt hmanga Congress-in an dan avanga J. Thankima College Programme Vanapa Hall, Aizawla neih turah a kal thei lo anga a lo sawi hi dawta inpuh hmingchhiatna a ni a, a lawmawm loh kan ti hle a ni,” tiin an tarlang bawk.
