Dt. 17.02.2023 (Friday) hian EF&CC Department bultumna-in ASEP chuan UPC (NEI) General Headquarters Complex, Mualpuiah leh 3rd Battalion MAP ah Awareness seminar leh Installation of Artificial Nest Box Programme an hmang. He hunah hian ASEP President K. Lalmuansanga chuan artificial nest box chungchanga zirtirna a pe a. Khawvel hmasawnna lo thang zelah kan nungchate chenna kan lo nekchep tak zel avangin savate pawhin chenna tur an vai tan a, chumi compensate ve nan chuan he programme hi kalpui a nih thu a sawi.
UPC General Superintendent Rev. R. Lalrinsanga chuan nungcha humhalh chu Pathian thu nena kalkawp tlat leh inhmeh tak a nih thu a sawi a. Pentecost Kohhran pawh hemi kawngah hian thahnemngaitu an nih thu leh theihtawp chhuah chu ringtute tih tur a nih thu a sawi a. 3rd Battalion MAP Commandant Pu Famkima pawhin Mualpui police hmun chu nungchate zalenna hmun nise a duh thu a sawi a, artificial nest box programme buatsaih hian rah tha duhawm tak a chhuah ngei a beisei thu a sawi ve bawk a ni.
UPC Complex leh Mualpui Battalion hmunahte hian hnatlangin Artificial Nest Box 30 vel dah a ni a, a theih ang angin savate an lawi leh lawi loh hi enzui chhoh zel a ni dawn a ni.
