Serchhip Bialtu MLA Lalduhoma chuan vawiin khan Assembly Session-ah Sports Minister Robert Romawia Royte hnenah ngaihdam a dil.
ZPM Leader leh Serchhip bialtu MLA Lalduhoma hian Robert Romawia chu footballer Miriam Lalnunsiami chu sorkarin a inhliam enkawlna a tumsak nia sawiah a puh a, Robert Romawia chuan Miriam -i chungchang House-ah a sawi chhuah loh thu a sawi thung. Assembly Speaker Lalrinliana Sailo chuan House proceeding enin, a dik lo zawkin ngaihdam dil turin thutlukna a siam a ni.
Vawiina Assembly Session-ah Assembly Speaker chuan House proceeding endikna atangin Lalduhoma a thiam lo zawk tih hmuhchhuah a nih thu a puang a ni.
Lalduhoma chuan Miriam Lalnunsiami a damlo inkhul chhuah dawna a buaizia leh a thianten khul chhuah House-ah a sawi chhuak tih sawiin, Zan lamah social media-ah inhnialna chhawk chuak a, an inhnial nasa hle. Social media-a thu lengvel leh House chhunga kan thusawi ka ngaihfin pek a, pawi ka ti khawp mai, a ti.
Hre reng chunga tilui a ni loh thu sawiin Lalduhoma chuan, “Ka hriatsual palh a nih liau liau a nih avangin kan minister zahawm tak ngaihdam ka dil,” tiin Assembly Speaker, MLA-te leh mipuite lakah pawh ngaihdam a dil thu a sawi.
Lalduhoma chuan, “Niminah Sports Minister-in Miriam-i nen an inbiak loh thu uar taka a sawi thu sawiiin, Social media lamah an inbiak zia a lang a. A tawngsual palh niin a lang a, a hriatsual palhah ngai ila ngaidam ve tho ang u,” a ti.
Tun session-ah hriatsual leh sawi sual a awm thin thu sawiin, Kan thukhel a nawi mah mah a, mipuite pawh an zahawm, tiin insiamthatna atan hman nise a duhthu a sawi.
