Vawiina Mizoram Lagislative Assembly Budget Session neih chhunzawmahm Rural Development Minister Lalruatkima chuan PMAY Gramin hnuaia In sak tanpuina first installment dawng tawhte chu sorkar laipui atanga sum dawn mil leh state Treasury-in sum a pek chhuah ang zela pek chhunzawm an nih tur thu House a hrilh.
Assembly Budget Session kal mekah vawiin khan zawhna chhangin Lalruatkima chuan, PMAY Urban chu UD&PA department hnuaia kalpui niin PMAY Gramin chu RD department-in a kalpui a, PMAY Gramin-ah hian in sak tanpuina Rs. 1,30,000 chu vawi li-a dawn tur a ni a, zaa 30 zelin vawi thum leh zaa 10-in a tawp berah dawn tur a ni a; Sorkar laipui mi rawihte data leh Mizoram data a inmil loh avangin khaw thenkhatin harsatna an tawk niin a sawi.
Minister chuan, kum 2017-2018-a Mizoram sorkar ngen angin kum 2019 February thla khan PMAY Gramin dawngtu tur tih fel a ni a. A dawngtu tur mi 20,512 zingah first installment dawng tawh 14,862; second installment dawng tawh mi 7,966; third installment dawng tawh mi 6,493; dawn tur zawng zawng dawng tawh mi 6,069 an awm a, la dawng miah lo mi 5,650 an awm, a ti a. Tuna dawn dan hi in satute tan a buaithlak hle a, Mizoram sorkar-in theihtawp chhuahin a bawhzui, a ti.
RD Minister chuan, Aadhar number leh Bank account number inmil lo chungchanga harsatna tawkte sorkarin a hriaa, BDO-te chu uluk lehzuala endik turin a hrilh niin a sawi a. Ni 100 inhlawhna chu mipuite’n an chhawr a, Ministry sum rawn pek Finance Department-in a do letna turah thahnem an ngai a, do letna tur sum neih tlin ngei tumin hma an la a ni, a ti.
