Aizawl, 23th Feb, 2023 : Republic Veng Kawipuia SBI ATM bomb hmanga beitu Emmanuel Lalbiakzauva (24) Bawngthah khua, tuna Ramhlun North, Aizawla khawsa mek chu Nilaini khan Mizoram police ten an man.
Hemi chungchangah hian vawiin khan Aizawl SP, C. Lalruaia chuan chanchinthar lakhawmtute kawmin, pawikhawihtu man a nih thu hi a puang a, Aizawl SP chuan, “Republic Veng, SBI ATM bomb hmanga beih a nih chungchangah Special Investigation team din a ni a, ngawrh takin hnuchhui hna thawh nghal a ni a. SIT te hnuchhuina kal zelah, pawikhawihtu hian a hma a alo chet tawh dan ang chiahin, Saikhamakawn SBI ATM ah hnuhma a nei tih an hmuchhuak a, bomb erawh a tipuak lo. CCTV atanga a chet vel dan an chhuizuina ah. Republic veng ATM a pawikhawihtu tho ni ngeiin an hria a, an chhuina kal zelah a chet velna hnuhnung ber chu Ramhlun bawr vel a nih avangin, chak takin an umzui a, Ramhlun North ah chhuiluh niin, February ni 22 khan bike a a kal chhuak leh tur chu man a ni,” a ti.
C.Lalruaia chuan, “Hemi hnu hian pawikhawihtu a ni ngei em tih chhuizui nghal ni bawkin. Republic veng a pawi a khawih laia a bike khalh atangte, a thawmhnaw hak atangte leh a hmaikawr atangte in amah ngei a ni tih finfiah a ni a. Republic veng, SBI ATM bomb hmanga a beih lai a a thawmhnaw hak te hmuhlet niin, a hmaikawr tichhia a a lo paih tawh pawh hmuhlet a ni a, hmaikawr dang, a lo siam leh tawh a. Man a nih lai hian gelatine an man sak tel bawk a, a bike kawl pawh hi Kulikawn atanga a ruk chhuah a ni,” a ti bawk.
Aizawl SP chuan thu an zawhfiahna atangin pawikhawihtu hian SBI ATM ngawr ngawr a bitum a, Emmanuel Lalbiakzauva hian SBI ah loan a dil a, a hmuh theih loh avangin SBI ATM hi a bitum zui ta niin a sawi a ni a ti a. “Nilaini hian man lo i la chuan SBI ATM khawi hmunah emaw bomb a puak leh ngeiin a rinawm,” a ti. Emmanuel Lalbiakzauva hi college kal thin, zirchhuak ta lo a ni a, a rem rem thawk a inhlawhfa thin niin, Ramhlun North a R. Lalthlamuana building ah a farnu nen a khawsa an ni.
