Mizo Zirlai Pawl (MZP) General Headquarters hruaitute chuan vawiin Ni 27th February, 2023 (Thawhtanni) chhun dar 12:00 khan Lalnunmawia Pautu President hoin, Power and Electricity Department Engineer-In -chief Er. Lalhmingliani Hmar chu a office-ah an hmu a, Zirlaite exam chhunga power supply khaihlak lo tura hma lakpui turin an ngen a ni.
MZP chuan, Zirlaite tana hun pawimawh HSLC leh HSSLC Examination vawiin Ni 27 February, 2023 atanga neih tanah, zirlaiten an zirlai tha taka an zir theih nan leh heng an exam hun chhunga power supply khaihlak lova pekchhuah a nih theih nan a theih ang anga hma lak sak turin E-in-C hnenah ngenna lehkha an pe a. Harsatna awm thei hrang hrang pumpelh a nih theih nana ruahmanna siam turin an ngen.
Power & Electricity Engineer-in-Chief Er. Lalhmingliani Hmar chuan HSLC leh HSSLC exam neih chhungin power supply khaihlak awm lo tura theihtawp an lo chhuahtur thu leh Department chhungah pawh power supply thazawk a awm theih nan thuchhuah an lo siam ve tur thu a sawi.
MZP chuan HSLC leh HSSLC zirlai exam hmachhawn mek te leh hmachhawn turte chu duhsakna sang ber a hlan a. Result duhawm tak an neih ngei a beisei takzet a ni. Chutih rualin, zirlaite rilru tiphawklek thei hrang hrang, ri bengchheng leh harsatna siam lo turin mitin a ngen nghal a ni.
