MJA President C Lalrambuatsaiha chuan vawiin February 27, 2023, Thawhtanni chhun dar 12:00 khan ICFAI University, Mizorama Management & Information Technology Department zirlai Industrial Study Tour-a kal turte a thlah liam.
Industrial Study Tour-a kal turte thlahna inkhawm hi YMA, |huampui Branch Committee Room-ah buatsaih a ni a; MJA President chuan, zirlaite chu hnam dang zingah hun eng emaw ti chhung an khawsak dawn avangin Kristian nula tlangval an nih angin mawi taka awm a, Isua Krista ringtu ni àwm rênga khawsa turin a fuih.
C Lalrambuatsaiha chuan, zirlaite chu an kalna apiangah hriat belh neih tum tura chahin, “Intelligent mind, intelligent eye nei ula. Industry hrang hrang in tlawhnaah zir chhuah neih ngei in tum tur a ni. Zawhna ngah ula, zawhna in ngah poh leh in hriatna a pung ang. Mizoram tan thil tha rawn puak chhuah tum ula, lehkhathiam kan nihna hi chhawr tlâk a nih theih nan inzir chhuah tum ang che u,” a ti. An thil tihna leh kal velnaah thiante nghah ngai bik leh buai bik ni lo tur te, thiante tibuaitu ni lo turtein a chah bawk.
ICFAI University Management & Information Technology Department zirlai Industrial Study Tour-a kalte hi zirlai 25 an ni a, zirtirtu pahnihin an hruai a, March 5, 2023-ah Mizoramah an rawn lêt ang. An zin chhungin Blueberry Amul industry, Vantage Circle, Assam Startup – The Nest leh NEDFI hmunte tlawhin an zir chiang dawn a ni.
