Vawiin ni 27.2.2023 hian All India Congress Committee ‘AICC 85th Session’, Raipur Chhattisgarh-a zuk tel; MPCC President Lalsawta leh Congress hruaitute chu Lengpui Airport-ah Congress Thalaiin hmuakin, a hmuaktute hmaah hian MPCC President hian Session an kal thute leh Mizoram siamtha turin theihtawp chhuah an tum thu a sawi.
“Hmun danga kal hian rualawh a na thin, Mizoram siamthat hi kan thei rengin kan hre si a, chuvang chuan rualawtin kan lo haw. Inthlan kum a ni a, theih tawpin kan han ti angang a, thalai ten theih tawp in thawh tak tak ang a, kan ram siam tur hian thil harsa a awm lo a,” Lalsawta, President MPCC chuan a ti a.
“Ram siamtha turin a mihringte ngaihtuahna tihdanglam sak hi a ni ber mai a, tuna kan kalphung mek anga pawisa nei tam tam ang ringawt, inthlanaah pawh tling tura kan hisap, nei ve lotena kan tel ve pha dawn loa kan han inhre sa ngawt ang chi hian min ti thlaphang thin a,” tiin MPCC President chuan a hmuaktute hmaah hian a sawi.
“Mahse hei hi chu mipuiin kan ngaihtuah dan ber kan tih danglam chuan Mizote thil zir chak kan nia, kan ram tan that lohzia kan hria a. Keimahni mai bakah kohhran leh NGO zanwg zawng leh Pathian thlengin a duh loh kan hria a, huai takin min puitu tur a phena awm hi an tha em a, kan sawrkar ngei theihna turin theih tawp kan chhuah dawn a ni,” tiin mipui ngaihtuah dan ber kan tihdanglam chuan a hausa leh neinung ringawtte ram hruaitu atana dahna rilru chu siam danglam theih a nih a beisei thu MPCC President chuan a sawi.
MPYCC President, Dr. Lalmalsawma, ‘AICC 85th Session’-a zuk tel chuan, “BJP sorkarna hnuaiah India ram hmun hrang hrangah Kristiante nekchepna a punlun hle a ni,” a ti a. “Hetih laia Kristian state tih hiala sawi Mizorama BJP-te lo vulh len hi kan tih tur a ni em tih hi mipuiten kan ngaihtuah ngun hle a ngai a ni,” tiin a sawi bawk.
‘AICC 85th Session’-a Mizoram atanga zuk kalte hi; Pu Lalsawta President MPCC, Pu CS Thanga, G/S, Dr. Lallianchhunga, Chairman, Media Dept. MPCC, Vanlalawmpuii Chawngthu, Ex-Minister, President Mahila leh Dr. Lalmalsawma, President te an ni.
MPYCC Vice President Laltawnliana hovin MPYCC member thahnem tawk takin ‘AICC 85th Session’-a kalte hi Lengpui Airport-ah an lo hmuak a, inkawmhona hun hi Lengpui Airport-ah hian neih nghal a ni.
