Vawiin ni 10.3.2023 (Zirtawpni) khan Goldel Hall, Congress Bhawan-ah Friday Political session neih a ni a. Vanneihtluanga’n ‘Politics Tha’ tih zirhona hun a hmang.
Vanneihtluanga chuan, Central Politics-ah Congress party chu a zen thuk ber an ni tih sawiin, Mizorama hlim a, lungawi mai a tawk lo. Mizoram-ah chauh ni lo, Centrala Politician lian leh larte bula che tla phak nih a tul. Ram rorelna hmuna Budget session-ah sawiho huna sawi tur hre lo ram hruaitu duh aia tam kan nei, mipui aiawh MLA te hriatna leh thiamna lama intuaihriam an mamawh, a ti.
Sorkar inrelbawlna dik a pawimawh thu sawiin, Dawt project hmangin central kan dawr a, Mizoram thlenpui rual rualin duh duha hman theih emaw kan ti. Kan data dik lo theh thlak thin hi kan tuar a ni, tih sawiin, dan bihruk san leh peh-hel thiamna hi finna ni tlata kan ngaih avangin smugling mantu tur hi smuggler karah bihruk a ngaih hun a thleng thei, hei hi Policy dik lo a ni, a ti.
Senior leh Junior inkar chungchang sawiin Vanneihtluanga chuan, Inthlan dawna fit thar vak hi a tul tawh lo, fit tluan chhuak mi kan mamawh tawh zawk. Mahni fate chhang ei ai ei sak duh nu leh pa nih a him lo. Senior-te engmah an ni lo, tih lam a ni lo. Senior te an hunlaia an that zia ngaihtuah a tul. Aia upa zawkte hriatna leh thiamna neih let nei tur leh rin ngam khawpa inbuatsaih si lova Senior Politician hnual suat ngawt a rem lo, a ti a. Senior-te pawhin kum 60 pelh tawh lamah chuan tangkaina bik leh engemaw bik nih si loh chuan inthiar fihlim nachang hriat hi Mizoram Political Party tinte mamawh a ni a. Inthiar fihlim nachang kan hriat loh a, ni ve tlata inhriatna hian Thalaite Traffic kan ti Jam tih hriat a pawimawh, a ti bawk.
Tling ila, Vote hmu teuh ila, chak ila, rorel ila, tih ngaiahtuahna paih a hun. Tupawh sorkar se he hnam a ral riai riai si chuan enge lukhawng kan neih? Kan damchhung reilo te a nghawng neih ve kan duh a nih chuan a hma mite tih ang ringawt ti tur hi kan ni tawh lo, eng lo awm rawh se, a ti. History chuan, Nang Politician hi Mizo hnam hi kan ral a nih ngai chuan a puh dawn che, a tlan chhe ngai dawn lo. Kan tu leh fate’n an puh tur kan nih dawn tho tho chuan engah nge kan tih theih sang ber hi kan tih loh ang, a ti.
MPCC President Lalsawta pawhin thusawiin, Pu Vanneihtluanga ram siamthatna tura thu pawimawh hrang hrang a sawi chu lawmawm a tih thu sawiin, hun in her avanga tih dan leh nun dan, kalphung her danglam a ngai tih sawiin, tute pawh hi boral mai tur kan ni. A hun leh ni kan hre lo. Chuvangin tuna thil tha leh dik tih hi mihring dam chhan a ni. Sorkar tha (Good Governance) siam turin Congress a sorkar a ngai a, chutiang a thlen theihna turin nakina danglam tum lovin tunah, engtik lai pawhin kan danglamna hi miin an hmu tur a ni, a ti bawk.
He hun hi Dr. Henry Zodinliana, President AIPC in a kaihhruaia a. C. Lalhriatpuia, Media Secretary, MPCC in Lunglei LMC inthlan chungchang report a pe bawk.
