“Dan hrula dik lo taka Mizorama vawk lakluh a pun leh tak avangin Mizoram Pig Farmers’ Association (MIPFA) te chu sorkarin min ngen angin hetiang thil thleng venpui tur leh report tur hian 17.03.2022 tlai aṭangin Sihhmuiahte kan duty a. Tukin dar 8.00 vel khan vawk pasarih vel phur an awm tih hriain, Tanhrilah kan tidinga Zonuam Police Out Post-ah kan hruai a, Police-te hian DC lam aṭanga Order an hmuh loh avangin an chhuah leh ta ringawt a ni,” tiin MIPFA chuan thu chhuah vawiin khan an siam.
Thuchhuahah chuan, “Mizoram Chief Secretary, Chairperson, State Disaster Management Committee, chuan nikum December thla aṭanga African Swine Fever (ASF) avanga vawk thi an awm tawh loh avangin 31.02.2022 khan Order a tichhuak a. He order hian state dang leh rampawn aṭanga vawk leh vawksa aṭanga siam lakluh khapna a hlip a, Order hi hlip mahse vawk lalut turin dan zawm tur fel tak duan a ni thung. Hemi hrulah hian dan zawm lova vawk lakluh a tam avangin tun hnaiah Mizoram khaw ṭhenkhat leh Aizawlah ngei pawh ASF hi hmuh a ni leh ta a.
“He thil thleng avang hian MIPFA chuan tun kar ni 16 (nilaini) khan AH & Vety. Secretary kan hmu a, DC tinah hei hi ‘check’ turin thu an pek tawh thu a sawi a, nimin 17.02.2022 khan AH & Vety. Minister Pu K. Beichhua kan hmu leh a, ani hian MIPFA chu ‘check’ pui tur leh Police hnena ‘report’ turin min ti a ni.
“Hetianga vawk pul hri hlauhawm tak ASF a lo darh leh mek laia DC tinte hnena ni 15.03.2022-a hriattirna pek vek an nih tawh laia Police lamin an man thei lote hi thil a fel lo kan ti hle a ni. Police lamin Order an lo la hmu lo a nih chuan Out Post tinte hi rang takin Order pek nghal ni rawh se, kan inven theih lai hian chak taka hma kan lal a ngai a, dan lova Vawk lakluh hrim hrim Police-in an man thei lo hi a khawi lai ber hi nge dik lo tih sorkar kan zawt nghal bawk a ni,” tiin an tarlang a ni.
