Chhiattawhna thil avanga Champhai tlawhtu Mizoram Chief Minister Zoramthanga chu Ni 26.3.2023 tlai khan a thlenna Circuit House ah Champhai North & South MNF hruaitu thenkhatten an kawm a. He hunah hian CM hi TJ.Lalnuntluanga, Law & Judicial Minister, Dr.ZR.Thiamsanga Champhai North bialtu MLA leh C.Lalramzauva, Adviser to CM ten an tawiawm a ni.
Mizoram Sorkar Flagship Programme, SEDP chungchang sawifiahin Chief Minister chuan, tuna chhungkaw Sing 6 dawng tawhtuten sum an dawn chhunzawm dawn bakah chhungkaw sing 6 dangte hnenah SEDP hi pek belh leh a ni ang a, Sorkarin sum kan neih ang angin SEDP chu kan kalpui dawn a ni a ti a, Bial hrang hrangin an chan zat tur erawhchu uluk zawka kan bituk a ngai ang a ti.
Chief Minister Zoramthanga chuan, Kumin kumtawp inthlan lo awm turah MNF Party chuan Seat 30 tal a lak a beisei thu sawiin Congress Party chu an artelukawn loh vek pawhin Seat hnih-khat bak an lak a rinawm loh thu a sawi a, BJP hian bial 2/1 te chu an chang ve leh maithei bawk niin CM chuan a sawi bawk.
ZPM a hmuh dan sawiin, MNF Party President chuan, Kum 2018 khan an inhampuar vak a, Congress ni lo, MNF ni lo Sorkar siam a ngai tiin keini chu Party pawh kan ni lova, Movement kan ni. Kohhran duh dan anga ding kan ni e, Kohhran hi kan Unit a ni tia insawiin Sorkar khalh ngil turin VUC kan nei an ti a. An thu sawi awih tawk mi engemawzat an awm hman a nih kha. Tunah chuan kalphung thar an tih hi mipuiin kan nuihzat tawh. Kum 36 zet kalphung thar zuar kual a, min chhin ve teh u ti thintute hi Mizoram mipuiin Inthlanna ah MLA 10 pawh an la pe ngai lova, a chang chuan an artelukawn nghe nghe a, Mizo mipuiin heng mite hi chhin tlakah an ngai lo a ni a ti.
India ram politics a inlumleh rualin NE State hrang hrangah pawh Politics a in lumlet thuai zel a. India ram hmarchhak ah BJP sorkar leh BJP thlawp Sorkar an piang sup sup a. Keini Mizo te chu Pathian ruat ang zelin kan kal a, Kan chheh vel State mipuite Central ah sorkar inthlak rualin nghing thin mahse, Kum 60 chuang MNF Party chu kan nghing lovin kan la ding khawng tlat a ni, MNF President chuan a ti bawk.
Chief Minister chuan Champhai bial hmasawnna tur thenkhat tarlangin, PAHOSS hnuaiah Govt.P/S-II hmunah, sikul awmsa tibo lovin Multi-Level Car Parking Cheng Vaibelchhe 7.5 senga siam tur a niin sum awmsa thlap, hma lak nghal theih a ni a, Chhangphut Field ah zan lama Football khelh theih turin hmalak a ni ang a, Tlangsam leh Zotlang inkar kawngpui chu Alkatra luan turin hma lak nghal theih a ni bawk a, hemi atan hian Cheng Vaibelchhe 4 ruahman a ni a ti bawk.
SASCI (Special Assistance to States for Capital Investment) sum dawnte chu MLA bial tinah cheng vaibelchhe 7 theuha semsawm a ni a, hnathawh tur ruahmanna lian tham deuh, mipui tana tangkai thei tur ber thawh tur uluk zawka ngaihtuah a tul thu sawiin Sorkar kumthar, 2023-2024 atan SASCI sum dang a lokal leh thuai dawna, hmasawnna hnathawh tur lo ruahman lawka, ngaihtuahna zau zawk pu turin Chief Minister chuan MNF Party hruaitute chu a chah bawk a ni.
A sawi zelnaah Chief Minister chuan Chhangphut Field to Falkawn, DC road laih zauh mek pawh tuna thawh mek hmabak zawng a aia zau leh nuamin, a kawng chhuat pawh uluk zawka metalled vek ni se. A tul chuan Spoil bank siam emaw, kawr ruamah Hume pipe phum a, ruam hnawhkhah emaw in hmalak dan tur kawng dap tha a a rinthu tarlangin, awlsam leh hautak lo zawka kawngpui zau leh mam tha nei theih tura hmalak nise a ti bawk.
