MPCC Treasurer Zodintluanga chuan, “Lunglei khawpui hian MNF sorkar hi thlak a duh hle tawh tih a chiang a. He sorkar hi kan thiat dawn a nih chuan fimkhur tak leh ngaihtuahna fim tak mipuiten kan put a ngai,” an ti.
Vawiina press statement a siamah Zodintluanga chuan, “LMC inthlan boruakah chawlhkar khat dawn lai Lungleiah ka cham ve ta a, Mimal in hrang hrang, dawr hrang hrang leh Bazarah te ka leng kual nasa a, chu ta tang leh mi titi atang te a ka hriat chian em em chu MNF paih hrim hrim in duh tih hi a ni. MNF mi leh sa pawh tam tak ka kawm a, Pu Zoramthanga’n kan ram a hruai dan leh Robert Romawia nena kan ram an suasam dan an hmuh hian Lunglei Municipal Council leh MLA Inthlanpuiah te MNF vote an tum tawh loh thu an sawi nasa hle a ni.
“Chutih lai chuan hun kal tawha Lunglei mipuite Vote thlak dan en let hi a tul in ka hria. Kum 2013 inthlanpuiah khan Lunglei East bial atanga Congress Party Candidate a thlan tlin , Pu Joseph Lalhimpuia khan Vote 5367 a hmu a. Amaherawh chu Kum 2018 Inthlanpui ah chuan MNF atanga thlan tlin Pu Lawmawma Tochhawng chuan Vote 4063 chauh a hmu a ni. Lunglei West ah pawh chutiang tho chu a ni. Kum 2013 Inthlanpuiah Congress Party atanga thlan tlin Pu Chalrosanga Ralte in Vote 5174 a hmuh laiin Kum 2018 a MNF atanga thlan tlin Pu C Lalrinsanga chuan Vote 4093 chauh a hmu a ni. Bial hrang hrangah pawh chutiang tho chu a ni . Heta tanga thil chiang e mem chu Party dangte nena kan inpawlh nasat tak avangin Kum 2013 a Congress Candidate te vote hmuh aia tlem feh mu chungin an tling thei. Hetiang dinhmunah hian kan ding leh thei tih I hria ang u. Party dang (ZPM) kan vote vak hian tling zo tak tak chuang si lo in mipuiin kan nin e mem MNF Party bawk hi an chak leh thei a. chuti a nih chuan Lunglei Khawpui enkawl hna chu Pu Zoramthanga bawkin a thawk leh dawn a ni.
“ZPM hian MLA Inthlanpuiah khan vote hmu ve nual mahse MLA inthlanpui kan neih hnua VC Inthlan hmasa ber, Kum 2020 khan Lunglei Khawpui Veng 24, VC Member 139 awmnaah ZPM ticket a VC thlan tlin chu Mi 14 chauh an ni. (MNF – 67, INC – 53, ZPM – 14) Hetiang a nih avang hian Lunglei Municipal Council Inthlanah ZPM hian Sorkarna chance an nei lo tih na a ni. Chuvangin Pu Zoramthanga kaihhruai MNF Party paih nan chuan mi leh sa nei tam, Congress Party kan hman a ngai a ni.
“Tin, Lunglei Khawpuia Sorkar hnathawk zawng zawngte hnena ka sawi duh chu hei hi a ni. ZPM Leader Pu Lalduhoma chuan “Sorkar hnathawk te chuan an lo eiru a ni thei a, a ziaawm ka ti, an ni chuan ram tan an ti hleinem, anmahni tan alawm lehkha an zir, officer nih an tum a, mahni hmasial a rawn kal chho kha an nia” a ti a nih kha.
“Sorkar hnathawkte hi eiru tur leh ram hmangaih lovah a chhuah che u. A hminga minister ka nih ve lai khan sorkar hnathawk ram hmangaih em em, eiru ngai lo, sorkar hnathawh hi ram rawngbawl naa ngai tam tak ka hria.
“Amah ngei pawh hi sorkar hnathawk thin a ni a, sorkar hna a thawh lai khan lo eiru ve ni ta se, a inthiam viau dawn tih a chiang reng.
“Ram hmangaih lo leh Ram tan a ti ve lo ang mai in sorkar hnathawkte a chhuah che u a, hmusit leh ngainep takin mahni tan lehkha zir leh Mahni hmasial taka a puh che u kha ka rilru a natpui hle mai che u a, Hetiang mi hi min hruaitu turin Kan duh em? Leader atan kan duh em tih hi ka chah duh che u a ni,” a ti bawk.
