AMC Ward III chhunga awm Local Council Chairman 5 (MNF party ami vek) ten, ni 18.3.2022 a an thuchhuaha an tarlanah, Pi C. Lalchhandami, Councillor AMC Ward III in Property Tax chu mimal hamthatna leh politics khelhna bakah ama duh dan chauhva hmang thin a an puhna hi thu belhchian dawl lo leh intih hmingchhiat tumna mai a nih thu ZPM Aizawl North II Block chuan sawiin a hnuai a mi ang hian sawifiahna an siam.
1. Local Council Chairman te hian thuchhuah an siam dawn hian L.C. member te rawn khawmna pawh nei lo va, AMC Ward-III Local Council Joint Resolution anga thuchhuah an siam ta mai hi, mipui thlan ve tho, Local Council member-te zahlohna leh inthamlohna lian tak a nih bakah kalphung dik taka hmalakna kalpui a nih laia sawiselna tur an zawng tlat hi mak kan ti hle a ni.
2. Kumin, January 19, 2022 (Nilaini) khan AMC Ward-III Committee meeting koh a ni a. He meeting ah hian Local Council aiawh 2 chauh an kal nghe nghe a ni. Ward Committee hian hna 4 thawh tur an rel ang thlapin Pi Damtei hian Property Tax atanga an pawisa dawn chu mipuite tan a hmang a. Ward Committee hi mumal takin an lo la kalpui ngai loh bakah AMC hnuaia Property Tax atanga hnathawh tur hi Local Council te kuta pek tur a nih thu hi dan a ziah lan a nih loh avangin Pi Damtei hian Ward Committee thu angin a kalpui a, chumi hrethiam lo chuan heti hian thuchhuah an siam ta mai niin a lang.
3. AMC Ward III Councillor Pi C. Lalchhandami hnathawh dan hi a langtlang a, ward mipuite tan a chhenfakawm em em lai leh, Ward chhung mipuite pawhin nasa taka an fak mek lai a, Ward chhung LC Chairman ten Joint Resolution lem hmanga hetianga thu belhchian dawl lo an chhuah ta mai hi thil an hriatthiam loh vang leh tih hmingchhiat an tumna ni ngeiah keini ZPM Aizawl North II Block chuan kan ngai a. Tun hnuah chuan hetianga intihhmingchhiat tumna hi thleng tawh lovin, AMC Ward-III mipuite tan thahnemngai taka ram rawng bawlho puiah kan sawm tak meuh a ni.
