Vawiin khan N.Vanlaiphaia MNF Unit panga, Bangla Veng, Rahsi Veng, Venglai, Rawlkhang leh Forest Veng Unit te chuan an khuain sorkara an thilngiat sorkar-in a tihhlawhtlin sak mai loh avanga lungawi lohlantir nan, MNF Gen. Hqrs. Vice Lalthlengliana hnenah an seal an thehlut a. “N.Vanlaiphaiah hian khawtlang phalna lo chuan MNF Unit a ding tawh lova, a tul a nih chuan khawtlang hruaitute dawr mai turin kan hriattir a che,” tiin an lehkhaah chuan an tarlang tel bawk.
N.Vanlaiphai khua hian, Mizoram sorkarin Jan. ni 31, 2023-a Block Agriculture Office (BAO) N.Vanlaiphai khua atanga E.Lungdar-a sawnna thuchhuah a lo siam tawh chu sut turin vawi engemaw zat sorkar an lo ngen tawh a. Vawiin pawh khan Total Bandh neiin, mipuiin an thlawp that avangin chhun dar 1:00 khan an hlip a, hei bakah hian Feb. ni 1, 2023 khan kawngzawh an lo huaihawt tawh bawk.
DND-in thu kan dawn danin, N.Vanlaiphai atanga seal thehlut tura lo kalte hi nimin lam khan, MNF Vice president Lalthlengliana chuan lengah sawmin, an thil ngiat chu tun tumah chawp leh chilha tih hlawhtlin sak mai theih a nih loh thu leh, Primary Health Centre (PHC) chu Community Health Centre (CHC) ah hlankai a lo tiam a. Lawm taka an chhuahsan hnuah, N.Vanlaiphai Joint Action Committee chuan an duh dan a nih loh thu leh, Seal an thehlut lo a nih chuan khawtlang mipuiin Pawndum nen an lo hmuah tur thu an sawi avangin, thehlut ngei turin vawiin khan MNF Gen. Hqrs. Treasurer K.Vanlalaua hnenah thehluh leh an tum a, amaherawhchu a lo dawn sak theih loh avangin, Lalthlengliana MNF Vice President chu Hnam Runah kovin, anin a lo dawn sak ta a ni.
