Lunglei District Youth Congress Committee (LDYCC) chuan thuchhuah siamin, “Dt 19.4.2023 zing lam Dar 2:00 vela District Jail Lunglei ațang a mi 5 an tlan chhuah avanga, Lunglei khawpui leh a chhehvel mipui te raltitna hi LDYCC te chuan pawi kan ti em em a, he thil thleng avang hian Dt 20.4.2023 khan LDYCC ten District Jail Lunglei chu a hmun ah tlawhin thil thlen dan leh chhan te kan en a.
“He tia awlsam tak a mi panga an tlanchhuah theih na chhan hi Mizoram sawrkarin District Jail Lunglei a hlamchhiah vang leh a tih tur a tih loh avanga thleng niin kan ngai.
Tun dinhmunah District Jail Lunglei ah hian thawktu mi 23 awm turah mi 13 chiah awmin Medical Duty tur pakhat mah an awm lo, nurse hi pakhat nei ve in, tun ah hian Serchhip ah attach niin pharmacist hi kumin January khan alo pension tawh a, a aiawh tur pawh hi vawiin thlengin dah ala ni lo bawk. District Jail Lunglei hian Ambulance pakhat a nei a,motor dang pakhat mah a nei lo thung,Driver pakhat mah pek an nih loh vangin emergency a motor khalh tur pawn warden atanga pawh chawp thin a ni,” an ti a.
LDYCC chuan, “District Jail Lunglei ah hian tang (inmates) awm thei zat (capacity) mi-100 anih laiin,tun dinhmunah hian mipa-134 leh Hmeichhia -16 an zavaiin mi-150 an awm mek a ni. Tang an tlanchhuah theihna thin hi District Jail thawktu te inthlahdah vang nilo in, thawktu te indaih loh vang leh Sawrkarin a tih tur a tih loh vangah kei ni LDYCC chuan kan ngai.
“District Jail Lunglei a an Building hrim hrim hi siam țhat leh thawm țhat mamawh em em vek an ni a,staff quater te pawh a tlabal em em tih a hmunah kan hmu a,a thawk tuten tha leh zung sengin an thawm țha țhin ani.tin, Duty post pasarih (7) awm zingah Mizoram Home Guard Duty te hian post thum (3) chiah an luah lum thei a,heng duty indaih lohna te pawh hi remchangah la in,Duty awm lohna post zawnah hian tlanchhuah nan an hmang thin a ni. District Jail Lunglei a Mizoram Home Guard Duty indaih lohna hi,Mizoram sawrkar hian a rang thei ang berin dah belh vat turin kan phut a ni.
“District Jail Lunglei in harsatna an tawh na hrang hrang te hi,18th may 2022 khan kan Media ten a hmunah chhui chiangin, an lo tlangau pui tawh a,kum khat dawn a nih hnu ah pawh an harsatna tawh te hi Mizoram Sawrkarin sutkian sak a hnek a,thawktute a hma aia indaihloh a an dah hi Mizoram Sawrkar hian District Jail Lunglei a ngaihthah zia ati lang chiang em em a,Lunglei District khawtlang leh mipui te nunphung alo ralmuan a lo him theih nan District Jail Lunglei hi thuam țha tur leh ngaihsak turiin keini LUNGLEI DISTRICT YOUTH CONGRESS COMMITTEE Mizoram Sawrkar chuan kan phut tlat a ni,” an ti bawk.
