Aizawl, the 21st March 2022 : Home Minister Pu Lalchamliana’n vawiin khan National Institute of Electronics & Information Communication (NIELIT) Zuangtui in Mizoram Police hnuaia hnathawkte mi 38 tana ni 3 awh tur Cyber Crime hnuhma chhuina training ‘Beginner Level of Digital Forensic and Cyber Crime Investigation with Hands-On’ tih chu a hawng.
Pu Lalchamliana chuan Information Technology thang chakin a rawn ken tel chu cyber crime a nih thu sawiin, helama thiamna a san ang zelin cyber crime pawh hi a pung chak a ni, a ti a. CID (Crime) Branch lamin an record dana 2021 ah khan Mizoram bikah Cyber Crime case 470 vel ziah luh niin chung zinga 70% vel chu pawisa lam kaihhnawih a nih thu a tarlang a. Cyber Crime te hi thiamna bik kan nei a nih loh chuan tih vak ngaihna a vang a, chhui chhuah leh in man te a har a. Chuvangin kan dona hmanrua hmasa ber tur hemi kawng thiamna kan neih leh chu thiamna tihpun chu a ni, a ti a. National Institute of Electronics & Information Technology (NIELIT) Aizawl in Police leh Law Enforcing Agency te mamawh tak mai pakhat Digital Forensics leh Cyber Crime lama training te pe thei tura hma an lak pui thei chu lawmawm tiin hun lo kal zel turah pawh training programme tam zawk te leh training an pek theih zat tur target te chu tihpun nise tiin a duhthu a sawi a ni.
Home Minister chuan Sawrkarin Cyber Crime chungchang chu a ngaih pawimawh avangin tunhnaiah Mizoram Police te, Forensic Science Laboratory te Digital Forensics leh Cyber Crime lam beihletna kawngah Sawrkar a in buatsaih chho nasat thu a sawi a. Chungte chu Mizoram Police hnuaiah Cyber Crime Police Station din te, Cyber Crime Prevention against Women and Children (CCPWC) Project hnuaiah Cyber Forensic Lab-cum-Training Centre din te leh Forensic Science Laboratory ah Cyber Forensic Lab hawn tak te a nih thu a thusawi a tarlang a.
Pu Lalchamliana chuan training nei tur te an training zawh hnuah mahni inzir chhunzawm zel tur te, IT Act leh Cyber crime lam kaihhnawih case awm te mahni pawha zir chiang peih tur te, Computer leh mobile phone te, software te thlengin zir chhunzawm peih turin a chah a. Training hi tluang taka zo thei tur leh rilru pe taka zira, kan thiam thar leh kan hriat belh te a tangkai thei ang bera chhawr tur te, Cyber Crime lama humsual lo dai palh te pui thei tura inzir zel tur te in duhsakna ka hlan che u a ni, a ti.
Special Invitee Prof. R.P. Vadhera, Vice Chancellor ICFAI University, Aizawl pawhin thusawiin Police tan sualna hrang hrang chhuichhuahna kawnga an thiamna tihpun nan training a pawimawh dante a sawi a ni. Training hawnna hun tawite hi NIELIT Director(incharge) Pu T Gunendra Singh chu kaihruaiin Pu Vanlalhmangaiha Khiangte, Scientist ‘C’ in lawmthu a sawi a ni.
Central Sorkar pawh hian Cyber Crime lo pung chho zel hi a vei khawp mai a. Hma a lakna hrang hrang zingah Ministry of Home Affairs chuan Indian Cyber Crime Coordination Center (I4C) a din a, Awareness Day /Cyber Jagrookta Diwas hi thla tin Nilaini hmasa berah hman thin tura tih a ni a. Cyber Jagrookta Diwas hi Mizoramah pawh hman chho ve mek a niin mipui nawlpuiin an en tur TV lama programme hrang hrang te, College leh Sikul lamah pawl hrang hrang ten an hriatthiam tawk tur ang zela zirtir tur tein ruahmanna siam mek a ni.
