Congress Party-in Mizoram chhim lam fanga zinchhuahna ‘Chhim Hrut Fehchhuah’ a buatsaih chu vawiin March 21, 2022 hian Lungleiah tan a ni a. A bultanna atan dar 1:00 PM khan MPCC Office Bearer-ten Lunglei Press Club-ah chanchinthar thehdarhtute an kawm.
Press Conference-ah hian MPCC President Pu Lalsawta chuan thusawiIn, “Kan ramin a mamawh ber chu SORKAR ṬHA a ni. Sorkar tha nei tur hian duhamna te, induhsakna dik lote hi a bo vek a ṭûl a. Ram hruaitute hma thlir ṭâwmpui phak loh vànga dodálnate hi awm mahse ram leh mipui tâna a ṭhat dawn phawt chuan sut tlang luih ngam huaisenna, Political Will (Ram leh mipui tâna ṭha tûr dodáltu engpawh su lui ngam tum ruhna’) kan nei ang. Congress Party hi kan danglam tawh. Pathian leh mipui zara sorkarna kan siam a nih a, kum 5 chhung mahni inhrek ngama sorkar kan kalpui ngat chuan kan ram leh mipui pawh hi kan danglam ngei ngei ang tih hi kan ring tlat. Minister leh MLA-te kan danglam chuan hmun hrang hranga kan party hruaitute leh mipui pawh kan danglam ngei bawk ang,” a ti.
Lalsawta chuan, “Lunglei hi Mizoramin mi ropui kan neih tam tak hringtu a ni a. Ram hruaitu ropui tak tak te, rawngbawltu ropui tak takte he khawpui atang hian an lo chhuak tawh. Chuvangin kan ngaihlu em em a ni. KMMTT hlawhtlin hunah phei chuan Mizoram kawt chhuah a ni dawn leh nghâl a. Chhim lam hi lo Inralrin a ngai nasa dawn a ni. Tuia Lunglei cháwmtu Tlawng hi nasa zâwka humhalh hna kan thawk ang.
“Kan ram hian chhiat lam kan pan zel thei a, that lam kan pan thei bawk. Tunah hian a kawng dik zawh turin kan la tlai lo. Sum hmanga ram rorélnaa luh tumtute hi kan ram hmelma an ni a, mipuiin kan hnawl a ngai a ni. Lei theiha min ngaitute hian min hmangaih lo a, min zuam em em ringawt a ni tih i hre reng ang u. Kan sorkar a nih chuan ‘Ṭang Puihna’ hmanga ṭhalai leh kuthna thawktute dinchhuahna tur kan buatsaih ang a, hei hian mihring rilru hruai dikin taimâkna leh rinawmna a hring ang. Sorkarin hnam ro ṭha pui pui siam ṭeuh mahse ram mipui khawtlang nun a tlákbal a, diknain ram rorêlnaah hmun a chan loh chuan kan hnam hi tluchhe thei kan nih avângin Sorkar Policy leh Programme hi Pathian leh a Kohhrante duh zawng anga tih kan tum ang.
“Lung ina awmte ‘Sual theih lohna bawm’ ang ni lo, mipuiin hlim leh nuam ti taka kan awm a, kan dinchhuah theihna túr ram rorėlna ṭha, ‘Ṭhat loh theih lohna Sorkar’ kan siam ang. That loh theih lohna bawm kan tih hi bawm tak tak a ni lo, ‘kalphung dik’ sawina a ni. Mizoram mipuite hruai nawm zia te, kan taimak ziate hi kan hria a, kalphung dika kan kal chuan reiloteah kan dingchhuak ngei ang. Kan kalphung a dik phawt chuan hmasawnna hnathawh a chhe thei tawh lo ang a, a tha vek tawh ang,” a ti bawk.
Pu Lalsawta chuan Journalist-te harsatna tawh mek chungchang sawiin, “Mipui leh sorkar inkara palai, mipuite zirtirna petu, Journalist-ten eizawnna kawnga in harsatnaah sorkar puihna tur in hmuh ang te in hmu mumal lo a, bill leh subscription fee pawh la hleithei lo a in awm tih ka hria. Heng in harsatna, hamṭhatna in lo dawn ṭhinte sorkarin a ngaihtuah lo hi a mak ka ti a, hmalam pan harsa khawpa a siam che u pawi ka ti. Chuvangin,sorkar hian chanchinbumite harsatna sukiang tura hmalakna a neih hi a tih makmawh a ni,” a ti. Press Conference zawhah hian Congress Bhavan, Lunglei-ah inkhawm buatsaih a ni bawk.
Congress Party ‘Chhim Hrut Fehchhuah’-ah hian MPCC Office Bearer pathum – Pu Lalsawta, President, Pu Lal Thanzara, Vice President, Pu Zodintluanga Ralte, Treasurer-te bakah hruaitu engemawzat an kal a. Lunglei, Lawngtlai, Siaha, Hnahthial leh Serchhip District te an tlawh dawn a ni.
