Mizo National Front, Aizawl South III South Block chuan thuchhuah siamin, “Dt. 19.04.2023 a Mizoram Sorkar LAD in Sumsuih VC te a suspend chungchangah hian thu chiang zawk tarlan hi Aizawl South III, South Block MNF chuan ngai lovin hre mah ila, ZPM Gen.Hqrs-in thu dik ziktluak lo an theh darh zêl takah chuan thu dik tarlan a lo ṭul ta a. Hengte hi mipuiin an hriat atan kan han tar chhuak a ni,” tiin a hnuai a mi ang hian an tarlang.
“Sumsuih Village Council Suspend ngai khawpa an awm hi pawi kan ti a. Chutih rual chuan ZPM Gen.Hqrs-in lo vui pui a, thiam thu an sawipui hi Sumsuih khawtlang an zah lo hleah kan ngai thung a ni. Sumsuih VC suspend an nihna chhan ṭobul chu hetiang hi a ni.
1. Sumsuih Safety reserve chhûngah Gram Sabha remtihnain VC hmasa ten Bâwng vulhtu mi panga te bâwng in sak chu a remti a. Bâwng vulhtu te hian Bâwng chaw hmun tur an dil tel chu Safety reserve chhûngah ramngaw a chereu dawn avangin an pe thei lo a ni. Chu chu tuna VC te hnênah hian Bâwng vulhtute hian Bâwng chaw hmun tur dil lehin VC hmasa ten an pek theih loh chu sefety reserve chhûng ngeiah an pe ta a ni. Chung an pek zingah chuan ZPM VC member leh VC Vice President pa te pawh an tel a. VC te thil tih dik lo hi Sumsuih khawtlang nu leh pa tam tak te’n MNF Unit ah zualkovin, hma la tûra an ngen angin MNF Party chuan hma a la ta a.
2. Ni 29.11.2021 (Nilai zan) ah MNF Unit chuan Committee neiin, an khawtlanga Safety reserved chereu an duh loh avangin VC ten Bâwng vulhtute safety reserve an vahtir chungchangah eng dan hmang a vahtir nge an nih tih zawhna an pe a. VC ten chu zawhna chu an chhan duh loh avangin safety reserve vah chereu anih theih dan hi ṭawngka in DLAO-ah an va zawt a. DLAO chuan a lo ngaih pawimawh em avang leh ziaka lehkha theh lut ngei tura a lo tih angin complaint letter chu MNF Unit ten ni 19.04.2022 ah an theh lut ta a ni.
3. Hetia Complaint a awm takah chuan Pu Lalrinzuala Pachuau Field Inspector chu LAD lam chuan ni 12.07.2022 khan a hmun ngeiah enfiah tûrin an rawn tîr ta a. Field Inspector in Office-ah report a pek hnuin MNF Unit in lehkha a theh luh hrang hrang hmangin Ni 15.07.2022 khan Pu Sangdingliana Ombudsman hmaah Sumsuih MNF Unit leh VC ten hearing an nei ta a ni.
4. Ombudsman thu tluknaah chuan dan bawhchhiatna a awm ngei ni a hriain, hêng point 5 te hmang hian endik tûrin LAD in Pu Lalrinzuala Pachuau chu a hmun ngeiah dt. 23.09.2022 ah a tir leh a ni.
1. Safety reserve vah chereu a ni em ?
2. Vah chereu zau zawng ?
3. Vah chereu anih chuan tu thû a vat nge ?
4. Thlai kumhlun phun a ni em ?
5. Phun anih chuan eng thlaite nge ?
*Hengte hi enfiah a nih a, office a report a pek leh hnuin LAD Jt. Director leh Field Inspector chu a hmun ngeiah ni 17.02.2023 khan spot verification neia rawn kal lehin, engkim enfiaha thla te lain thu tlukna an siam ta a ni.*
Heta thil rawn lang chiang ta chu – ram hâwhtîr (temporary land lease) emaw, ram pek (permanent allotment of land) pawh nise, dan kalha thil tih a awm a. Section 5 (1) (a) of the Mizoram (Forest) Act, 1955 chuan, “State Government phalna (permission) lak hmasak zet phawt loh chuan mi tumahin Village Safety reserve huam chhûngah thing an kit tûr a ni lova, engemaw thil dang atan he reserved huam chhûng ram hi an hmang tur a ni lo. Thing ro (dead tree) chu an khawtlang tana ṭha thei tur ang berin Village Council- in a dek ral thei ang” tiin a sawi.
*Hetia Sumsuih VC (ZPM) te Suspend chungchangah hian ZPM Block leh Headquarters meuhin thu dik zir chiang hmasa lova thu chhuah leh Press Conference meuh an nei ta mai hi thu diko hmanga mipui rilru hruai kawi tumnaah kan ngai a. Sumsuih mipui tam zawk hian VC suspend hi awm an tih lai a, ZPM Gen.Hqrs-in dan bawhchhe zawk an ṭan tlat hi mak kan ti a. Dan bawhchhetu ṭan tlat hi mipui sorkar siam tum kalphung thar zia tur em ni dawn tih hi kan zawhna a ni.*
He Forest Act an bawh chhiat hmanga suspended an ni hi dan an bawh chhe ngei a ni tih chiang taka a lan avâng hian, Sumsuih VC ten Village Safety Reserve an vawng him zo lova, Section 5(1)(a) leh Section 19 of the Mizoram Forest Act,1955 an bawh chhiat avâng a Mizoram Sorkarin The Lushai Hills District (Village Council) Act, 1953 Section 25(1) hmang a an chawlhtîr (suspended) hi keini Aizawl South III, South Block MNF te chuan ZPM VC te hi suspend mai ni lovin dissolved ngei turin Sorkar kan phûtin kan ngen a ni,” an ti.
